Shkup, 21 korrik, Zhurnal.mk – Presidentja Gordana Siljanovska‑Davkova sot priti presidenten e Indisë, Droupadi Murmu, e cila po qëndron në vizitën e parë zyrtare të një shefe të shtetit indian në Maqedoninë e Veriut.
Në konferencën e përbashkët për media, Siljanovska‑Davkova theksoi se Maqedonia sheh potencial të madh për thellimin e bashkëpunimit politik dhe ekonomik me Indinë, veçanërisht në tregti, investime, arsim, shkencë, turizëm dhe transformim digjital. Ajo rikujtoi edhe lidhjet historike mes dy vendeve përmes Lëvizjes së të Painkuarve, si dhe trashëgiminë e përbashkët të Nënë Terezës.
Presidentja Murmu, nga ana e saj, paralajmëroi zgjerim të bashkëpunimit në disa fusha, përfshirë inteligjencën artificiale, turizmin, farmacisë, bujqësinë, industrinë e përpunimit të ushqimit dhe artet audiovizuale, me synim rritjen e shkëmbimit tregtar. Ajo prezantoi edhe tre iniciativat globale të Indisë, të lidhura me energjinë solare, biokarburantet dhe promovimin e mjekësisë tradicionale, të cilave Maqedonia ka paralajmëruar se do t’u bashkohet.
Gjatë vizitës, Murmu njoftoi edhe për një dhuratë nga populli indian për qytetarët e Maqedonisë — bustin e Mahatma Gandit, i cili do të vendoset solemnisht gjatë qëndrimit të saj në vend, si simbol i miqësisë mes dy shteteve.
