Shkup, 17 maj Zhurnal.mk – Prokuroria Themelore Publike në Shkup ka kërkuar masën e paraburgimit afatshkurtër prej 48 orësh për 19-vjeçarin nga fshati Bojanë, i dyshuar për vrasjen e një 18-vjeçari që ndodhi të premten, më 15 maj, në zonën e Sarajit.
Sipas Prokurorisë, po vazhdon procedura për mbledhjen e provave, ndërsa është lëshuar urdhër për kryerjen e autopsisë së trupit të viktimës, si dhe për ekspertizë të gjurmëve dhe analiza krahasuese të armës me të cilën dyshohet se është kryer vepra penale.
“Ekziston dyshim i bazuar se veprën penale ‘Vrasje’, sipas nenit 123 paragrafi 1 të Kodit Penal, e ka kryer një 19-vjeçar nga i njëjti fshat, i cili tashmë është privuar nga liria”, thuhet në njoftimin e Prokurorisë.
Autoritetet theksojnë se kërkesa për paraburgim është bërë për shkak të rrezikut të arratisjes, mundësisë së ndikimit mbi dëshmitarët dhe fshehjes së gjurmëve, si dhe rrezikut që i dyshuari të kryejë vepër tjetër penale.
Prokuroria njofton se hetimet për rastin janë ende në zhvillim dhe se pas sigurimit të të gjitha provave pritet hapja formale e hetimit.
