Tiranë, 03 qershor, Zhurnal.mk – Kryeministri Edi Rama reagoi sot ndaj protestave që po zhvillohen ditët e fundit në kryeqytet lidhur me ngjarjen në Zvërnec.
Rama ndau në rrjetet sociale pamje të një grupi protestuesish para selisë së PS-së, një grup, sipas tij, të rinjsh pa busull nën ndikimin e urrejtjenxitësve.
“Kjo ‘Shqipëria e shqiptarëve’ është tëpkë si ‘Greqia e grekëve’, ajo e atyre çakejve të Agimit të Artë që donin t’i digjnin të gjallë ‘tradhtarët’ e Greqisë bashkë me shqiptarët, të cilët sipas tyre po merrnin punët e paratë e popullit grek. Çuditërisht edhe ata ishin kundër investimeve e resorteve cilësore, me të vetmin ndryshim se këta “shqiptarët tanë të vërtetë” nuk kishin gisht në kuturisjen e atyre, kurse ata kanë gishtin e tyre në kuturisjen e këtyre”, shtoi Rama.
Më poshtë reagimi i plotë i kryeministrit Rama:
“Mysafirët e paftuar të natës në selinë e Partisë Socialiste.
“Shqipëria e shqiptarëve” dhe këto çeta kinse shqiponjash që ulërasin kësisoj rrugëve, të kujtojnë “Gjermaninë e gjermanëve” me ata ulëritësat e verbër si këta mysafirët e natës tek selia e PS, që e kthyen Gjermaninë në thertoren e hebrenjve dhe e katandisën në delen e zezë të planetit.
Po meqë Gjermania naziste është larg dhe zëre se i kam përpara syve urrejtjenxitësit e këtyre të rinjve pa busull duke u thënë, “ju s’jeni nazistë ju jeni patriotë, prandaj jepini fort gojës së shthurur se do ta djegim Shqipërinë e tradhtarëve”, po shtoj që kjo “Shqipëria e shqiptarëve” është tëpkë si “Greqia e grekëve”, ajo e atyre çakejve të Agimit të Artë që donin t’i digjnin të gjallë “tradhtarët” e Greqisë bashkë me shqiptarët, të cilët sipas tyre po merrnin punët e paratë e popullit grek.
Çuditërisht edhe ata ishin kundër investimeve e resorteve cilësore, me të vetmin ndryshim se këta “shqiptarët tanë të vërtetë” nuk kishin gisht në kuturisjen e atyre, kurse ata kanë gishtin e tyre në kuturisjen e këtyre.
Fali Zot se s’dinë se ç’bëjnë thuhet në këto raste”.
