Tiranë, 14 maj Zhurnal.mk – Pasi votuan me konsensus rezolutën për integrimin, Partia Socialiste dhe Partia Demokratike u ulën së bashku në një prej zyrave të sallës së seancave plenare për të gjetur kompromis mbi Rregulloren e Kuvendit.
Në këshillin e mandateve u diskutuan 4 propozime; 3 që vinin nga radhët e socialistëve dhe propozimi i Partisë Demokratike.
Demokratët pranuan propozimin e kryetarit të kuvendit Niko Peleshi, që ligjet e nevojshme për integrimin të kalojnë me procedurë të përshpejtuar, por vetëm në rastet kur Brukseli kërkon miratimin e tyre të shpejtë.
Socialistët pranuan propozimin e demokratëve që nëse një institucion nuk u jep informacion deputetëve atëhere ndërhyn kryetari i kuvendit që kërkesa e deputetëve të plotësohet.
Por socialistët hodhën poshtë kërkesën e opozitës që komisioni i integrimit të ndahet nga komisioni i jashtëm.
Debatin më të fortë me opozitën por edhe brenda vetë socialistëve e shkaktuan kompetencat që i janë dhënë komisionit për mbikqyrjen institucionale të drejtuar nga Fatmir Xhafaj.
Gazment Bardhi bëri të qartë se opozita ështe kundër këtyre kompetencave dhe debati më i fortë u zhvillua mes kryetarit të grupit parlamentar të PS Taulant Ballës dhe kryetarit të komisionit të ligjeve Ulsi Manjës.
Balla u tërhoq nga propozimi i tij fillestar që komisioni i drejtuar nga Fatmir Xhafaj të ketë kompetencë kontrollin post legjislativ, një propozim me të cilin Ulsi Manja nuk ishte dakord.
Manja nuk ishte dakord as me kompetencat që propozimi i Taulant Ballës i jep këtij komisioni në lidhje me raportimin e institucioneve të pavarura dhe hartimin e rezolutës duke bërë amendamente të reja.
Mbeter për tu parë nëse të enjten e ardhshme mazhoranca e opozita do të gjejnë apo jo gjuhën e kompromisit për Rregulloren e Kuvendit.
