Tiranë, 19 gusht, Zhurnal.mk – Mundësitë për forcimin e marrëdhënieve Shqipëri–Kazakistan, me fokus zhvillimin e lidhjeve ajrore, bashkëpunimin ekonomik dhe investues, turizmin dhe kontaktet ndërmjet rajoneve, ishin në qendër të një takimi të zhvilluar në Ambasadën e Kazakistanit në Tiranë.
Ambasadori i Kazakistanit në Shqipëri, Iskander Aisariyev, zhvilloi bashkëbisedim me përfaqësues të medias shqiptare, ekspertë, një përfaqësues të Ministrisë për Evropën dhe Punët e Jashtme dhe diplomatë të Ambasadës.
Takimi u zhvillua pas një informimi mbi Kushtetutën e re të Kazakistanit dhe zgjedhjet e para për Kurultain, parlamentin e ri njëdhomësh të vendit, të planifikuara për më 23 gusht 2026.
Këshilltari i ambasadës, Baurzhan Alzhanov, prezantoi elementet kryesore të reformës kushtetuese, ndërsa eksperti shqiptar i së drejtës ndërkombëtare, Dr. Redion Luli, dha një vlerësim profesional në gjuhën shqipe mbi ndryshimet institucionale.
Sipas të dhënave të paraqitura në takim, Kushtetuta e re e Kazakistanit u miratua në referendumin e 15 marsit 2026 dhe hyri në fuqi më 1 korrik. Një nga ndryshimet kryesore është zëvendësimi i parlamentit dydhomësh me Kurultain, një legjislaturë kombëtare njëdhomëshe me 145 deputetë dhe mandat pesëvjeçar.
Gjatë diskutimit u shpjegua edhe origjina e emërtimit “Kurultai”, i lidhur me traditën historike të kuvendeve të Stepës së Madhe. Megjithatë, u theksua se institucioni i sotëm është një organ modern kushtetues dhe legjislativ, me kompetenca të përcaktuara nga Kushtetuta.
Në fokus të veçantë të takimit ishin marrëdhëniet dypalëshe.
Ambasadori Aisariyev nënvizoi interesin për intensifikimin e dialogut politik dhe krijimin e më shumë mundësive për bashkëpunim ekonomik e institucional mes Shqipërisë dhe Kazakistanit.
Një nga çështjet e diskutuara ishte përmirësimi i lidhjeve ajrore ndërmjet dy vendeve dhe perspektiva e krijimit të një linje të drejtpërdrejtë në të ardhmen.
Sipas pjesëmarrësve, një lidhje e tillë mund të ndikonte në rritjen e turizmit, kontakteve të biznesit dhe lëvizjes së qytetarëve.
Mundësia, megjithatë, mbetet për t’u studiuar dhe koordinuar më tej me institucionet dhe operatorët përkatës.
Palët diskutuan gjithashtu për identifikimin e projekteve me interes të ndërsjellë dhe nevojën për kontakte më të drejtpërdrejta mes sipërmarrësve dhe institucioneve që mbështesin investimet në të dy vendet.
Një tjetër drejtim i bashkëpunimit lidhet me forcimin e kontakteve ndërmjet rajoneve dhe bashkive.
Ambasadori Aisariyev informoi pjesëmarrësit mbi vizitat e tij në disa rajone të Shqipërisë dhe takimet me drejtues të autoriteteve vendore, duke vlerësuar se bashkëpunimi lokal mund t’u japë marrëdhënieve dypalëshe përmbajtje më konkrete, veçanërisht në ekonomi, turizëm dhe kulturë.
Në takim u trajtua edhe politika e Kazakistanit në fushën e çarmatimit bërthamor. Pas shpërbërjes së Bashkimit Sovjetik, Kazakistani hoqi dorë nga arsenali bërthamor që kishte trashëguar dhe mbylli poligonin bërthamor të Semipalatinskut më 29 gusht 1991. Me nismën e Kazakistanit, Kombet e Bashkuara e shpallën 29 gushtin Ditën Ndërkombëtare kundër Testeve Bërthamore.
Bashkëbisedimi në Tiranë u fokusua kështu jo vetëm në zhvillimet e fundit institucionale në Kazakistan, por edhe në mundësitë për ta zgjeruar dialogun Shqipëri–Kazakistan përmes diplomacisë, biznesit, turizmit, medias, ekspertëve dhe bashkëpunimit ndërmjet autoriteteve vendore.
