Uashington, 17 prill, Zhurnal.mk – Ministri i Punëve të Brendshme, Panče Toshkovski, po qëndron për vizitë pune në Washington, D.C., në kuadër të sesionit të dytë të Dialogut Strategjik Maqedoni e Veriut–SHBA, një proces që vlerësohet si i rëndësishëm për avancimin e sigurisë kombëtare dhe publike.
Gjatë qëndrimit, Toshkovski ka zhvilluar takime me përfaqësues të lartë të institucioneve amerikane të sigurisë, përfshirë Nicholas Kolura, zëvendësndihmës sekretar i shtetit dhe drejtor i Diplomatic Security Service (DSS), si dhe Christopher G. Wray nga FBI. Ai është takuar gjithashtu me drejtues të tjerë të strukturave të sigurisë, përfshirë përfaqësues të ICITAP dhe të Byrosë për narkotikët ndërkombëtarë dhe zbatimin e ligjit.
Sipas njoftimit të Ministrisë së Punëve të Brendshme, gjatë takimeve është theksuar se Maqedonia e Veriut konsiderohet partner i besueshëm operacional i sigurisë për Shtetet e Bashkuara të Amerikës, ndërsa bashkëpunimi mes dy vendeve po thellohet në fusha konkrete me interes të përbashkët.
“Këto takime dërgojnë një mesazh të qartë se Maqedonia e Veriut është e njohur si një partner i besueshëm i SHBA-së, me të cilin po ndërtohet një bashkëpunim i thelluar dhe konkret në fushat kyçe të sigurisë”, deklaroi Toshkovski.
Fokusi i bisedimeve ishte në luftën kundër trafikimit të qenieve njerëzore, tregtisë së paligjshme të drogës, krimit të organizuar ndërkombëtar, forcimin e sigurisë kufitare, si dhe përballjen me terrorizmin.
