Uashington, 26 maj, Zhurnal.mk – Presidenti amerikan, Donald Trump deklaroi se uraniumi i pasuruar i Iranit ose do t’i dorëzohet Shteteve të Bashkuara të Amerikës për t’u shkatërruar ose do të asgjësohet në një vend tjetër të pranueshëm, ndërsa vazhdojnë negociatat për një marrëveshje kornizë që synon t’i japë fund luftës me Iranin.
Në një postim në platformën e tij Truth Social, Trump shkroi se uraniumi i pasuruar do të dorëzohej menjëherë në SHBA për t’u shkatërruar ose do të asgjësohej në vend, apo në një lokacion tjetër të dakordësuar me Teheranin.
Sipas tij, procesi duhet të mbikëqyret nga Komisioni i Energjisë Atomike, ose ekuivalenti i tij.
Megjithatë, nuk ishte e qartë nëse ai i referohej një institucioni amerikan apo Agjencisë Ndërkombëtare të Energjisës Atomike (IAEA).
Po ashtu mbetet e paqartë nëse presidenti Trump po përshkruante gjendjen aktuale të negociatave, një kërkesë amerikane në bisedime apo një pikë tashmë të dakordësuar në kuadër të një marrëveshjeje të mundshme.
Fati i rezervës iraniane prej rreth 400 kilogramësh uranium të pasuruar në nivel të lartë konsiderohet një nga çështjet më të vështira në negociata.
Trump deklaroi të shtunën se një marrëveshje kornizë ishte negociuar në masë të madhe.
Izraeli dhe SHBA-ja nisën së bashku operacionet ushtarake kundër Iranit më 28 shkurt.
Kryeministri izraelit Benjamin Netanyahu tha të dielën se ai dhe Trump kishin rënë dakord gjatë një bisede telefonike se çdo marrëveshje përfundimtare me Iranin duhet të eliminojë kërcënimin bërthamor.
Sipas Netanyahut, kjo nënkupton çmontimin e objekteve iraniane për pasurimin e uraniumit dhe largimin nga vendi të rezervave të uraniumit të pasuruar në nivel të lartë.
