Shkup, 22 mars, Zhurnal.mk – Miratimi vendimin të Qeverisë për uljen e Tatimit mbi Vlerën e Shtuar (TVSH) për karburantet nga 18 në 10 për qind, Vlen njofton se kjo masë synon të zbusë ndikimin e rritjes së çmimeve dhe të lehtësojë barrën financiare për qytetarët dhe bizneset.
Nga VLEN theksojnë se ky hap është i domosdoshëm në kushtet e krizës globale dhe luhatjeve në tregjet energjetike, të cilat kanë ndikuar drejtpërdrejt në rritjen e kostos së jetesës. Sipas tyre, ulja e TVSH-së do të ndikojë pozitivisht në standardin e jetesës, duke ulur presionin mbi buxhetet familjare, sektorin e transportit dhe aktivitetin ekonomik në përgjithësi.
“Ndërmarrja e masave konkrete, të përgjegjshme dhe në kohë është thelbësore për të ruajtur stabilitetin ekonomik në vend. Kjo masë synon të zbusë goditjen e drejtpërdrejtë nga rritja e çmimeve,” thuhet në njoftimin e VLEN-it, transmeton Zhurnal.mk.
Njëkohësisht, autoritetet njoftojnë se do të intensifikohen kontrollet në treg, me qëllim parandalimin e abuzimeve të mundshme, rritjeve të pajustifikuara të çmimeve dhe çdo forme të përfitimit në dëm të qytetarëve.
