Lajmi kryesor në qarqet sportive gjatë ditës së djeshme dhe sot (e enjte) është largimi i papritur i Cristiano Ronaldos nga grumbullimi i kombëtares së Portugalisë, ndërsa tashmë kanë dalë në dritë detaje të reja nga drama që u zhvillua në Kopenhagë.
Portugalia kishte mbërritur në kryeqytetin danez para ndeshjes së Ligës së Kombeve ndaj Danimarkës, e cila zhvillohet sonte nga ora 20:45. Megjithatë, në mes të ditës, Ronaldo mblodhi valixhet dhe u largua nga hoteli ku qëndronte kombëtarja.
Pakënaqësia e tij raportohet se kishte nisur që nga ndeshja e kaluar ndaj Norvegjisë, të cilën e nisi nga banka rezervë. Në pjesën e dytë, trajneri Jorge Jesus e dërgoi yllin portugez në nxehje, por në fund vendosi të mos e aktivizonte.
Ronaldo thuhet se ishte dukshëm i frustruar me situatën. Menjëherë pas vërshëllimës së fundit, ai u fut me shpejtësi në dhomat e zhveshjes dhe nuk qëndroi në fushë së bashku me pjesën tjetër të ekipit për të përshëndetur tifozët portugezë.
Sipas raportimeve, Ronaldo nuk ishte stërvitur me grupin në ditët pasuese, ndërsa presidenti i Federatës Portugeze të Futbollit, Pedro Proença, thirri një takim për të zgjidhur situatën. Në takim morën pjesë edhe Ronaldo dhe Jorge Jesus.
Mediat portugeze raportuan fillimisht se keqkuptimet mes palëve ishin zgjidhur. Megjithatë, largimi i papritur i Ronaldos nga grumbullimi i Portugalisë duket se tregoi se situata ishte shumë më e komplikuar.
Më pas, Ronaldo publikoi një mesazh në Instagram, doli nga hoteli në Kopenhagë dhe u nis drejt aeroportit. Drejtuesit e Federatës, sipas raportimeve, u përpoqën ta ndalonin largimin e tij në terminal.
Jorge Jesus dhe Pedro Proença u larguan me nxitim nga baza e kombëtares dhe u drejtuan drejt aeroportit të Kopenhagës, me synimin për ta kapur Ronaldon para nisjes së avionit privat dhe për ta bindur që të qëndronte me ekipin.
Megjithatë, përpjekja e fundit për negociata në terminal nuk pati sukses. Ronaldo raportohet se refuzoi kërkimfaljet dhe lutjet e tyre për të ndryshuar mendje dhe, pa bërë deklarata, hipi në avionin e tij privat.
Më pas, ai u largua nga Danimarka dhe u drejtua për në Madrid, duke e lënë Portugalinë pa kapitenin e saj para përballjes me Danimarkën.
Edhe pse Portugalia pas dy ndeshjeve kryeson grupin me gjashtë pikë, tri më shumë se Danimarka dhe Norvegjia, zhvillimet rreth Ronaldos kanë bërë që rezultatet sportive të mbeten në plan të dytë.
