Bruksel, 16 gusht Zhurnal.mk – Zjarri në Belgjikë është më shumë se dyfishi i madhësisë së atij të vitit 2011, kur u dogjën pothuajse 1,400 hektarë, sipas të dhënave nga Sistemi Evropian i Informacionit për Zjarret në Pyje.
Zjarrfikësit luftuan gjatë gjithë natës me zjarrin më të madh pyjor të regjistruar ndonjëherë në Belgjikë, i cili deri në mëngjesin e sotëm ishte përhapur në rreth 3,000 hektarë dhe po lëvizte drejt kufirit gjerman, thanë autoritetet lokale, raportoi Reuters.
Zjarri ka shpërthyer që nga e premtja në rezervatin natyror Haut Fanj (kënetë e lartë) në pjesën lindore të vendit. Zjarrfikës nga e gjithë Belgjika, si dhe ekipe nga Gjermania dhe Luksemburgu fqinjë, janë përfshirë në shuarjen e tij, si dhe ushtria dhe fermerët vendas.
Shërbimet po përqendrohen sot në vijën e zjarrit që po lëviz drejt Gjermanisë dhe shpresojnë që temperaturat më të ulëta dhe lagështia më e lartë do të ndihmojnë në lokalizimin e tij, tha për Reuters zëdhënësja e administratës së Wallonisë, Stephanie Hernu.
Zjarri është më shumë se dyfishi i përmasave të atij të vitit 2011, kur u dogjën pothuajse 1,400 hektarë, sipas të dhënave nga Sistemi Evropian i Informacionit për Zjarret në Pyje.
Qyteti gjerman i Monschau, pranë kufirit belg, tha të hënën se zjarri nuk pritej të përhapej në territorin gjerman, por paralajmëroi se pritej ndotje e konsiderueshme nga tymi.
“Prandaj, është vendosur të rekomandohet që banorët në zonat pranë kufirit të largohen nga ato zona”, thanë autoritetet e qytetit në një deklaratë.
Bashkimi Evropian dje dërgoi tre helikopterë dhe dy aeroplanë zjarrfikës nga vende të ndryshme evropiane, pasi Belgjika kërkoi ndihmë urgjente.
