Shkup, 14 shkurt – Në prag të muajit të shenjtë të Ramazanit, Komuna e Çairit, në bashkëpunim me Ndërmarrjen Publike “Ujësjellës dhe Kanalizim”, ka nisur sot një aksion për inspektimin, pastrimin dhe kontrollin e rrjetit të kanalizimit fekal dhe atij atmosferik në territorin e Çarshisë së Vjetër, transmeton zhurnal.mk/zh/.
Aksioni, i cili do të vazhdojë edhe gjatë ditës së nesërme, ka për qëllim sigurimin e funksionimit të rregullt të sistemit të kanalizimeve dhe parandalimin e përmbytjeve ose shqetësimeve të tjera që mund të lindin gjatë periudhës së frekuentimit të shtuar në këtë zonë. Ekipet e specializuara po kryejnë pastrime të kanaleve, inspektime të magistralave dhe kontrolle të pusetave për të garantuar qarkullim të pandërprerë të ujërave.
Komuna thekson se kjo ndërhyrje synon përmirësimin e kushteve për banorët dhe bizneset e Çaršisë së Vjetër, si dhe ruajtjen e pastërtisë dhe sigurisë publike gjatë muajit të Ramazanit. Banorët dhe pronarët e bizneseve në zonë i bëhen thirrje të lehtësojnë qasjen e ekipeve pune dhe të lajmërojnë çdo problem të vërejnë në rrjetin e kanalizimit.https://zhurnal.mk/
