Tetovë, 16 tetor Zhurnal.mk – Në selinë e Partisë Demokratike Shqiptare (PDSH), sot u mbajt mbledhja e zgjeruar e Kryesisë Qendrore, ku morën pjesë edhe kryetarët e degëve të partisë. Në fokus të diskutimeve ishte situata aktuale politike në vend dhe në rajon, si dhe mundësia e përditësimit të Marrëveshjes Politike të PDSH-së.
Gjatë mbledhjes, kryetari i partisë paraqiti analizën e tij mbi zhvillimet aktuale politike dhe çështjet që lidhen me Marrëveshjen Politike të PDSH-së, duke hapur diskutimin për nevojën e rishqyrtimit të saj në rrethanat e tanishme politike.
Pas një diskutimi të gjerë dhe shkëmbimit të mendimeve, anëtarët e pranishëm votuan unanimisht për formimin e një grupi punues, i cili do të ketë për detyrë të rishqyrtojë Marrëveshjen Politike të partisë.
Grupi punues do të analizojë mundësinë e përditësimit dhe plotësimit të marrëveshjes, por edhe nevojën për ruajtjen e saj në formën aktuale. Të gjitha alternativat do të shqyrtohen, ndërsa grupi do të përgatisë propozime dhe rekomandime që do t’i paraqiten për shqyrtim të mëtejshëm.
Vendimi për formimin e grupit punues shënon nisjen e një procesi të brendshëm vlerësimi, përmes të cilit PDSH-ja do të shqyrtojë nëse Marrëveshja Politike duhet të përshtatet me zhvillimet e reja apo të vazhdojë të mbetet në formën e saj aktuale.
