Shkup, 5 maj, Zhurnal.mk – Kryeministri i Maqedonia e Veriut, Hristijan Mickoski, ka zhvilluar sot në Qeveri një takim me përfaqësues dhe sportistë nga Special Olympics Maqedonia, si dhe me ekipin e Special Olympics Europe–Eurasia, ku i pranishëm ishte edhe ministri i Sportit Borko Ristovski, përcjell Zhurnal.mk.
Në fokus të takimit ishte iniciativa për futjen e aktiviteteve sportive “Unified” në sistemin arsimor, një koncept që u mundëson nxënësve me dhe pa aftësi të kufizuara të ushtrojnë sport së bashku në mjedise shkollore.
Sipas kryeministrit Mickoski, kjo nismë përfaqëson një hap të rëndësishëm jo vetëm në zhvillimin e sportit, por edhe në ndërtimin e vlerave shoqërore si respekti, barazia dhe bashkëjetesa.
“Si Qeveri, i japim mbështetje të plotë kësaj iniciative dhe besojmë se ajo do të sjellë ndryshime pozitive në shoqëri. Qëllimi ynë është që çdo fëmijë të ketë mundësi të barabarta për zhvillim, të pranohet dhe të marrë pjesë aktive,” u shpreh Mickoski.
Qeveria thekson se do të vazhdojë të mbështesë programe që nxisin përfshirjen sociale dhe barazinë përmes sportit dhe arsimit.
