Deçan/Gllogjan, 06 maj, Zhurnal.mk – Kryetari i Bashkimit Demokratik për Integrim, Ali Ahmeti, ka marrë pjesë sot në homazhet për nder të heroit të kombit, Luan Haradinaj, me rastin e përvjetorit të rënies së tij.
Homazhet u zhvilluan në Deçan dhe në Kompleksin Memorial të Dëshmorëve të Zonës Operative të Dukagjinit në Gllogjan, ku Ahmeti, së bashku me bashkëluftëtarë dhe përfaqësues institucionalë, nderuan jetën dhe veprën e të rënëve për lirinë e Kosovës, përcjell zhurnal.mk.
Në fjalën e tij, Ahmeti theksoi se figura e Luan Haradinajt mbetet simbol i qëndresës dhe sakrificës për atdheun.
“Luan Haradinaj, së bashku me vëllezërit e tij dhe mijëra luftëtarë të Ushtria Çlirimtare e Kosovës, mbetet simbol i guximit dhe përkushtimit për lirinë”, u shpreh ai.
Gjatë homazheve u nderua gjithashtu edhe veprimtari i hershëm i çështjes kombëtare, Smajl Haradinaj, për të cilin Ahmeti theksoi se ishte udhërrëfyes për brezat e luftëtarëve të UÇK-së.
Ahmeti theksoi se kujtimi për dëshmorët mbetet detyrim i përhershëm moral dhe kombëtar.
“Nderimi për dëshmorët është dhe do të mbetet obligim i përhershëm. Lavdi e përjetshme për të gjithë ata që sakrifikuan për lirinë”, përfundoi ai.
