Shkup, 10 qershor, Zhurnal.mk – Presidentja Gordana Siljanovska-Davkova, nga Samiti i Procesit për Bashkëpunim në Evropën Juglindore (PBEJL) në Sofje, bëri thirrje për ringjalljen e frymës së bashkëpunimit rajonal dhe rikthimin te parimet mbi të cilat ky proces u themelua para tre dekadash.
Në fjalimin e saj, ajo paralajmëroi se Evropa Juglindore po përballet me sfida serioze, si emigrimi masiv i të rinjve, plakja e popullsisë, prapambetja ekonomike dhe përkeqësimi i rrethanave gjeopolitike. Sipas saj, këto probleme kërkojnë udhëheqje të guximshme dhe të përgjegjshme, të bazuar në solidaritet dhe interesa të përbashkëta, e jo në politika të ngushta e të pjesshme.
Siljanovska-Davkova theksoi se procesi i zgjerimit të Bashkimit Evropian duhet të mbështetet në mënyrë konsekuente mbi kriteret e Kopenhagës, ndërsa dinamika e anëtarësimit të varet ekskluzivisht nga përparimi në zbatimin e reformave.
Duke iu referuar mendimit të shkrimtarit bullgar Georgi Gospodinov se “kur dyert e së ardhmes mbyllen, e kaluara bëhet atdheu i vetëm”, presidentja tha se Ballkani ka nevojë për debalkanizim përmes evropeizimit.
Ajo vlerësoi se integrimi evropian është jo vetëm natyral, por edhe domosdoshmëri gjeopolitike dhe e sigurisë, duke nënvizuar se një Ballkan i qëndrueshëm, prosperues dhe evropian është në interes si të vendeve të rajonit, ashtu edhe të vetë Evropës.
“Suksesi i çdo shteti duhet të shihet si sukses i të gjithë rajonit. Në vend të bllokadave dhe ndarjeve, duhet të garojmë në dije, inovacion, kulturë dhe zhvillim ekonomik”, theksoi Siljanovska-Davkova, duke bërë thirrje për më shumë përgjegjësi rajonale si parakusht për një të ardhme të përbashkët të parashikueshme dhe të sigurt. /Zhurnal.mk
