Shkup, 18 gusht, Zhurnal.mk – Maqedonia është shtet i sigurt dhe i qëndrueshëm, ndërsa Ushtria përfaqëson shtyllë të stabilitetit dhe institucion mbi të cilin qytetarët dhe partnerët mund të mbështeten, theksoi ministri i Mbrojtjes, Vlado Misajllovski.
Ai nënvizoi se modernizimi i kapaciteteve ushtarake po realizohet në përputhje me dinamikën e planifikuar, përmes blerjes së armatimit modern, investimeve infrastrukturore dhe përmirësimit të kushteve të punës.
„Është më se e qartë se lufta konvencionale ka ndryshuar dhe për të qenë të përgatitur për përgjigje, nevojitet përshtatje në konceptin e mbrojtjes“, tha Misajllovski.
Sipas tij, janë në proces blerjet e sistemeve artilerike dhe kundërajrore, dronëve, pajisjeve për mbrojtje kibernetike dhe sistemeve të komunikimit.
„Procesi i modernizimit të Ushtrisë po realizohet sipas planeve tona. Ka mbërritur shumë pajisje“, shtoi ministri, duke paralajmëruar se këtë vit pritet edhe ardhja e dy helikopterëve të rinj.
Për projektet infrastrukturore në periudhën e ardhshme janë parashikuar mbi 12 milionë euro, ndërsa deri tani janë investuar më shumë se 3,1 milionë euro. Gjithashtu është paralajmëruar rikthimi në funksion i Qendrës për Trajnimin e pilotëve dhe formimi i një katedre të re për aviacion ushtarak në Akademinë Ushtarake.
„Në periudhën e ardhshme do të vazhdojmë me ritëm edhe më të fuqishëm ta zhvillojmë Ushtrinë me më shumë blerje të çdo lloj pajisjeje, me investime të forta në infrastrukturën e Ushtrisë, me më shumë stërvitje dhe më shumë trajnime“, tha Misajllovski.
Duke folur për financimin, ai theksoi se buxheti i mbrojtjes këtë vit arrin mbi katër për qind të BPV-së.
„Në këtë mënyrë e forcojmë sigurinë tonë, sigurinë e rajonit dhe të krahut lindor të NATO-s. Në të njëjtën kohë tregojmë se jemi aleat i besueshëm dhe kredibil brenda aleancës“, tha ai.
Misajllovski theksoi edhe pjesëmarrjen e ushtarëve në misionet ndërkombëtare në Letoni, Bullgari, Rumani dhe Kosovë, duke paralajmëruar përmirësimin e statusit të tyre të punës përmes një marrëveshjeje të re kolektive.
