Shkup, 17 shtator, Zhurnal.mk – Në deklaratën e sotme për media, zëvendëskryetari i Qeverisë dhe ministër i transportit Aleksandar Nikolovski foli për aktivitetet ndërtimore në pjesën më të ndërlikuar të autostradës te Botuni, si dhe për zgjidhjen teknike me të cilën stabilizohet terreni i paqëndrueshëm. Ai theksoi se kushtet specifike të terrenit deri më tani kanë paraqitur sfidë serioze për ndërtimin, por me angazhimin e ekspertëve vendorë dhe të huaj është gjetur zgjidhje. Nikolovski shpjegoi se problemi buron nga karakteristikat natyrore të tokës, gjë që e vështirëson stabilizimin e terrenit.
“Ka gjëra që mund t’i bëjmë dhe gjëra që nuk mund t’i ndryshojmë. Ajo që nuk mund ta ndryshojmë është toka. Rreth jush mund të shihni se bëhet fjalë për tokë të zezë grafitike, e cila është toka më e paqëndrueshme që mund të gjendet. E tillë është mali. Këtu ka edhe shumë ujë, gjë që shihet nga vegjetacioni, rreth nesh, dhe kur uji bashkohet me grafitin, atëherë krijohet një lëng dhe nuk ka asnjë stabilizim. Kjo është arsyeja pse kjo pjesë rreth fshatit Botun deri më tani ishte e pamundur”, tha Nikolovski.
Ai theksoi se kushtet në atë pjesë janë arsyeja kryesore pse ajo pjesë e autostradës është e ndërlikuar dhe kërkon qasje të ndryshme, dhe shtoi se në procesin e gjetjes së zgjidhjes kanë qenë të përfshirë profesorë dhe ekspertë vendorë, shkencëtarë dhe kompania “Sinohydro”.
“I mblodhëm mendjet më të mëdha që ka Maqedonia, i mblodhëm profesorët më të mirë që ka Maqedonia dhe njerëzit më me përvojë, në bashkëpunim me shkencëtarë botërorë, me njerëz që këtë e kanë bërë në vende të tjera në botë dhe sigurisht në bashkëpunim me ‘Sinohydro’ dhe me shkencëtarët e tyre, dhe zgjidhjen e kemi pas nesh. Pikërisht, stabilizimi do të bëhet me një teknikë speciale e cila, kur të ndërtohet autostrada, për fat të keq askush nuk do të mund ta shohë më, dhe prandaj deshëm ta prezantojmë sot”, tha Nikolovski dhe shtoi:
“Pas nesh mund të shohim makina, secila peshon nga 130 tonë, të tilla për momentin ka tre, do të shtohen edhe dy, pesë makina që u sollën posaçërisht për këtë punë, u sollën nga jashtë shtetit. Secila prej këtyre makinave futet në tokë në gjatësi prej 20 deri në 28 metra. Kjo është ndërmjet 7 dhe 11 kate ndërtese. Futet në tokë 7 deri në 11 kate poshtë, futen kafaze armatimi, secili kafaz armatimi peshon nga 30 tonë hekur dhe pastaj derdhen me beton. Midis tyre ka tuba dhe ka litarë çeliku, që i mbajnë njëri me tjetrin dhe praktikisht ne nën tokë krijojmë një strukturë të plotë që duhet ta mbajë bazën e autostradës. Zgjidhje të tilla do të bëhen gjithsej 250 në autostradën Ohër‑Kërçovë, prej të cilave 163 janë te Botuni, të tjerat janë në pjesët e tjera të autostradës, duke përfshirë edhe te Knezino, te Kërçova, dhe në këtë mënyrë zgjidhet pjesa më e vështirë e autostradës”.
Nikolovski thotë se kjo zgjidhje është risi në të gjithë rajonin dhe për këtë arsye është objekt interesi te publiku profesional.
“Kjo është bindshëm pjesa më e vështirë inxhinierike dhe kjo është pjesa që paraqet risi jo vetëm në Maqedoni, por në të gjithë rajonin, diçka për të cilën do të ligjërohet në fakultete dhe rastësisht simpoziumi më i madh botëror i shkencëtarëve në fushën e ndërtimtarisë që dje filloi në Shkup, sot ligjërohet pikërisht për këtë që është pas nesh”.
