Tiranë, 22 tetor, Zhurnal.mk – Kuvendi miratoi sot mes përplasjeve projektligjet në rendin e ditës, pasi deputetët e opozitës bllokuan foltoren dhe penguan zhvillimin normal të seancës plenare.
Në këto kushte, pas një ndërprerje disa minutëshe, Kuvendi rinisi me fjalën e Kreut të Grupit Parlamentar të Partisë Socialiste, Taulant Balla, i cili kërkoi që Kuvendi të kalonte në votim të ligjeve në rendin e ditës, çka rriti edhe tensionet, pasi deputetët e opozitës i shkulën mikfrofonin. Kreu i Kuvendit hodhi në votim kërkesën e propozuar nga Balla, e cila u miratua me shumicë të votave.
Votimi i pikave në rendit të ditës u krye me kartona, për shkak të një defekti teknik tek sistemi i votimit elektronik, teksa deputetët e opozitës krijuan tensione të forta, kaos dhe përplasje fizike.
Situata u përshkallëzua edhe më tej teksa kryeparlamentari Niko Peleshi ka hedhur në votim rendin e ditës, moment kur deputetët e Partisë Demokratike kanë tentuar të marrin kartonët e votimit nga deputetët socialistë.
Kuvendi miratoi me 76 vota pro projektligjin “Për ratifikimin e konventës së Këshillit të Evropës për Mbrojtjen e Profesionit të Avokatit, bërë në Luksemburg, më 13 maj 2025”.
Kuvendi miratoi me 76 vota projektligjin “Për ratifikimin e marrëveshjes, ndërmjet Këshillit të Ministrave të Republikës së Shqipërisë dhe qeverisë së Republikës së Maqedonisë së Veriut, për ngritjen e pikave të përbashkëta të kalimit kufitar ndërmjet Republikës së Shqipërisë dhe Republikës së Maqedonisë së Veriut dhe kryerjen e veprimtarive të përbashkëta të kontrollit kufitar”.
Kuvendi miratoi me 76 vota pro projektligjin “Për disa ndryshime dhe shtesa në ligjin nr. 55/2020, “Për shërbimet e pagesave””.
Kuvendi miratoi me 76 vota pro projektligjin “Për parandalimin e pastrimit të parave dhe financimit të terrorizmit”.
Kuvendi miratoi me 76 vota pro projektligjin “Për disa shtesa dhe ndryshime në ligjin nr. 35/2016, “Për të drejtat e autorit dhe të drejtat e tjera të lidhura me to”, të ndryshuar”.
Kuvendi miratoi me 76 vota pro projektligjin “Për treguesit gjeografikë për produktet artizanale dhe industriale”.
Kuvendi miratoi me 76 projektvendim “Për ngritjen e Komisionit të Posaçëm Parlamentar për fazën e dytë të Reformës Administrativo-Territoriale në Republikën e Shqipërisë”.
