Tiranë, 12 nëntor, Zhurnal.mk – Ministri për Europën dhe Punët e Jashtme, Ferit Hoxha zhvilloi sot një takim në Asamblenë Kombëtare të Hungarisë me Márton Hajdu, kryetar i Komisionit për Punët e Jashtme, dhe Ildikó Éva Sopov, kryetare e Komisionit për Çështjet Evropiane.
Gjatë takimit, Hoxha shprehu mirënjohjen për mbështetjen e qëndrueshme të Hungarisë ndaj rrugëtimit evropian të Shqipërisë, që nga ratifikimi i hershëm i Marrëveshjes së Stabilizim-Asociimit e deri në fazën vendimtare të sotme të negociatave për anëtarësim.
Ministri informoi se në takim u dakordësua për rëndësinë e thellimit dhe konkretizimit të bashkëpunimit parlamentar, përmes grupeve aktive të miqësisë dhe shkëmbimeve praktike mbi të drejtën e BE-së dhe procesin e anëtarësimit.
“Ndërsa Shqipëria punon për mbylljen e kapitujve të tjerë të negociatave, një dialog më i ngushtë mes komisioneve tona parlamentare mund të jetë një vlerë e shtuar e rëndësishme”, shtoi Hoxha.
Në këtë drejtim, Hoxha nënvizoi se zgjerimi nuk është vetëm punë e qeverive.
“Parlamentet miratojnë reformat, mbikëqyrin zbatimin e tyre dhe, në fund të procesit, ratifikojnë anëtarësimin. Një bashkëpunim më i fortë mes tyre i jep procesit legjitimitet më të thellë demokratik dhe e mban integrimin evropian pranë qytetarëve, të cilëve ai duhet t’u shërbejë”, u shpreh ai.
