Tiranë, 12 nëntor, Zhurnal.mk – Ish-presidenti Ilir Meta ka bërë deklarata të forta gjatë seancës së sotme në Gjykatën e Posaçme, ku po gjykohet për çështjen ndaj tij.
Top Channel raporton se ish-presidenti Meta ka mohuar përfshirjen e tij në financat e Partisë së Lirisë (ish-LSI), duke pretenduar se përgjegjësia për këto çështje i takonte sekretarisë ose kryesisë së partisë.
Ai u ndal edhe te çështja e lobimit, duke deklaruar se i vetmi rast kur ka ndërhyrë politikisht, por jo financiarisht, ka qenë parapagimi prej 15 mijë dollarësh, i cili sipas tij është kryer në mënyrë të ligjshme dhe me vendim të kryesisë.
Gjatë fjalës së tij, Meta përmendi edhe ish-ambasadoren amerikane Yuri Kim, për të cilën përdori tone të ashpra, duke e cilësuar si “armike të përbetuar të Shqipërisë në shërbim të Serbisë”.
Ish-presidenti hodhi gjithashtu akuza për ndërhyrje nga përfaqësues të ambasadave të huaja në procesin e emërimit të anëtarëve të Gjykatës Kushtetuese.
Ai pretendoi se, gjatë kohës që ishte President i Republikës, ishte kërcënuar nga pesë përfaqësues ambasadash për të mos emëruar Marsida Xhaferllarin, por Arta Vorpsin.
“A e di ajo gjykatë se jam kërcënuar si President i Republikës nga 5 fëlliqësira ambasadash, që përfaqësonin 5 ambasada të huaja, që të mos ishte Marsida Xhaferrllari në Kushtetuese, por të ishte ajo e Lanës, Arta Vorpsi?, tha Meta.
Meta u shpreh se nuk përjashton mundësinë që, sipas tij, përmes manipulimeve të ngrihen edhe akuza absurde, deri në një komplot për vrasjen e presidentit amerikan John F. Kennedy.
Deklarata e plotë e Ilir Metës në GJKKO:
“Nuk habitem të ngrenë akuzë edhe për komplot për vrasjen e Kennedy-t me këto manipulime që janë bërë. Marrëveshja ka qenë mes dy subjekteve GSIS-Unifi. Kryetari i LSI-së vepron sipas ligjeve. Kryetari nuk ka pasur të bëjë me financat, i ka sekretaria ose kryesia e partisë. Aq më tepër për lobimet, asnjë shpenzim. Nëse ka një njeri që e di më mirë këtë, është zoti Kllapi. Ngushëllime për humbjen e nënës, se e mora vesh nga mediat. Kllapi e di mirë, jemi takuar para se të arrestohesha.
I vetmi rast i dokumentuar që kam ndërhyrë politikisht, jo financiarisht, është pagesa e ligjshme prej 15 mijë dollarësh si parapagim. Kjo është bërë me vendim kryesie. Nuk po i futem përrallave të tjera. Kanë qenë të diktuara nga Yuri Kim, armike e përbetuar e Shqipërisë në shërbim të Serbisë.
Nëse prokurori ka të drejtë të njoftojë që kam bërë pagesa, nuk i kam bërë, sepse nuk kam marrëdhënie me Shatkun, as me askënd. Zonja ka të drejtën të mbrohet. Do të mbajë ajo përgjegjësi. Nuk e di cilës gjykatë i është referuar SPAK-u që prej dy vitesh të bllokoheshin informacionet nga GSIS për LSI-në.
A e di ajo gjykatë se jam kërcënuar si President i Republikës nga pesë përfaqësues ambasadash të huaja, që të mos ishte Marsida Xhaferllari në Kushtetuese, por të ishte ajo e Lanës, Arta Vorpsi?
Ajo gjykatë nuk e di që unë iki që sot me shpenzimet e mia në SHBA, nëse ata kanë gjë me mua. Në SHBA edhe Maduron e arrestuan me mandat arresti. Ka të bëjë seriozisht me marrëdhëniet shqiptare amerikane. Çdo veprim e kam bërë përmes zonjës. Kontrata është aq e specifikuar, çdo gjë e verifikueshme.
Pretendimi i prokurorisë që qenka blerë shtëpi, qenka një mesazh 28 qershor 2009 se unë gjëja paskam mesazh me zotin Ismaili me 22 qershor, por oficeri i policisë gjyqësore e ka bërë me 28 qershor procesverbalin. “Takohemi nesër se më duhen 200 mijë patjetër”. Nuk ekziston një mesazh i tillë. Pse e ka bërë p.v me 28 në darkë, sepse me 29 qershor ishin zgjedhjet dhe mendonte se do fitonte partia e tij. DIA është regjistruar pas 14 muajsh në Shqipëri. Prokuroria është fiksuar te 200 mijëshi. I kërkoj prokurorisë t’i drejtohet DIA-s të Washingtonit, bëni një letër porosi. /tch/
