Shkup, 23 qershor, Zhurnal.mk – Anketa e “WeBalkans”, e publikuar ditëve të fundit, zbulon një hendek të thellë mes besimit të lartë të qytetarëve të Maqedonisë së Veriut ndaj organizatave ndërkombëtare dhe skepticizmit të theksuar ndaj institucioneve vendore. Ndërsa Bashkimi Evropian gëzon mbështetje nga dy të tretat e popullsisë, sistemi gjyqësor dhe partitë politike përballen me nivele të ulëta besimi, raporton DW, transmeton Zhurnal.
Sistemi gjyqësor ka nivelin më të ulët të besimit – plot 76% e të anketuarve kanë deklaruar se nuk kanë besim. Pasojnë partitë politike me 68,7% mosbesim dhe Kuvendi me 61,9%. Nivele të ulëta besimi janë regjistruar edhe ndaj Qeverisë (56,1%), Presidentit (54,9%), mediave (51%) dhe pushtetit lokal (58,1%).
Nga ana tjetër, institucionet e vetme që ruajnë shumicë besimi janë bashkësitë fetare (60,8%) dhe ushtria (58,5%).
Korruptimi si pengesë kryesore për përparim
Anketa është realizuar në periudhën shkurt–prill 2026, mbi bazën e intervistave me një kampion përfaqësues prej 1.000 personash mbi moshën 15 vjeç.
Rezultatet tregojnë se 36,5% e qytetarëve e identifikojnë korrupsionin si pengesën kryesore për përparim dhe integrim në BE, ndërsa 26,7% e shohin si problem sistemin gjyqësor jofunksional. Për më tepër, 24,6% mendojnë se paaftësia e institucioneve për të zbatuar reforma është një pengesë serioze.
BE-ja ruan besim të lartë tek qytetarët
Në kontrast me skenën vendore, Bashkimi Evropian mbetet aktori ndërkombëtar më i besueshëm. Besimi në BE arrin në 79,5%, ndërsa 67% e qytetarëve e mbështesin anëtarësimin e vendit në familjen evropiane.
Edhe pse perceptimi pozitiv ka shënuar një rënie të lehtë (nga 65,4% në vitin 2025 në 61,4% në vitin 2026), mbështetja për anëtarësim mbetet e qëndrueshme.
Qytetarët e shohin BE-në si partner kyç:
• 84% mendojnë se mbështetja financiare është e lartë ose e moderuar
• 40,8% e shohin BE-në si donatorin më të madh
• Përfitimet kryesore të pritura janë standardi më i mirë i jetesës (46,8%) dhe e ardhmja më e mirë për të rinjtë (41%).
