Arnold Schwarzenegger u kthye në Belfast, dekada pasi vizitoi për herë të parë qytetin si një bodibilder i ri, ku iu dha një nder i veçantë.
Konkretisht, Universiteti i Ulsterit organizoi një pritje zyrtare dhe i dha një doktoraturë nderi yllit të Hollivudit, i cili më vonë ndërtoi një karrierë politike. Ai u vlerësua për kontributin e tij në shërbimin publik, avokimin për mbrojtjen e mjedisit dhe artin.
Duke folur në këtë aktivitet, Schwarzenegger theksoi se vizita e tij e parë në Belfast në vitin 1966 ishte një pikë kthese në jetën e tij, sepse ishte hera e parë që ai kishte folur në publik.
Ai kujtoi se në atë kohë nuk dinte anglisht dhe gati sa nuk i ra të fikët kur iu kërkua t’i drejtohej turmës në një garë bodybuilding-u. Me ndihmën e prezantuesit, ai arriti të thoshte disa fjalë dhe publiku e shpërbleu me duartrokitje.
Foto: EPA-EFE
“Ajo që ndodhi atë ditë në Belfast ishte shumë e rëndësishme për mua, sepse çdo herë pas kësaj, pasi fitoja një konkurs, shkoja te mikrofoni. Çdo herë flisja gjithnjë e më shumë dhe në fund nuk mund të më mbyllnin gojën, më pëlqen shumë të flas në publik”, kujtoi ai.
Vizita e tij e parë në Irlandën e Veriut në vitin 1966 ishte me ftesë të një gjyqtari vendas të bodybuildingut. Pa para, atleti i panjohur në atë kohë kaloi natën në shtëpinë e një mikpritësi në Dundonald, ku, thuhet, iu shtrua një vakt tradicional.
Gjatë ceremonisë, Schwarzenegger bëri shaka gjithashtu se ishte “mashtruar” që të kthehej në Belfast pas një video-telefonate me përfaqësuesit e universitetit disa muaj më parë.
“Kur më pyetën nëse besoja ende në lirinë e fjalës, thashë po. Pastaj thanë: ‘Në rregull, do të mbash një fjalim më 30 mars në Belfast’. Kështu që më mashtruan, nuk mund t’i shpëtoja më pafajësisë”, qeshi Schwarzenegger.
