Bruksel, 15 qershor Zhurnal.mk – Komisionerja për Zgjerimin e Bashkimit Evropian, Marta Kos, deklaroi të hënën se qeveria shqiptare ka garantuar Komisionin Evropian se projekti turistik prej më shumë se 1.4 miliardë eurosh, i lidhur me Jared Kushner, do të respektojë standardet mjedisore evropiane.
“Ne kemi marrë garanci nga qeveria e Shqipërisë se do të kryhet një vlerësim i plotë i ndikimit në mjedis dhe se standardet evropiane të mjedisit do të respektohen”, tha Kos gjatë një konference për shtyp.
Deklarata vjen në një moment kur projekti luksoz turistik në bregdetin shqiptar ka nxitur protesta masive dhe debat publik mbi ndikimin e tij në zonat e mbrojtura mjedisore.
Shqipëria konsiderohet një nga vendet më të avancuara në procesin e anëtarësimit në Bashkimin Evropian, pas Malit të Zi. Megjithatë, për të përfunduar negociatat e anëtarësimit, Tirana duhet të harmonizojë legjislacionin e saj me acquis communautaire, përfshirë standardet e mbrojtjes së mjedisit.
Vetëm pak ditë më parë, zëdhënësi i Komisionit Evropian për Zgjerimin, Guillaume Mercier, u bëri thirrje autoriteteve shqiptare të veprojnë “pa vonesë” për të shmangur rrezikimin e procesit të anëtarësimit, pas shqetësimeve të ngritura nga Brukseli lidhur me projektin.
Komentet e tij shkaktuan reagime në Tiranë, pasi u interpretuan si një qëndrim paraprak i Komisionit Evropian, ndërkohë që procesi i vlerësimit mjedisor vazhdon ende.
Kos mbajti një ton më pajtues, duke nënvizuar se protestat janë pjesë e vlerave themelore evropiane.
“Fakti që kjo po ndodh ndërsa Shqipëria po kalon procesin e anëtarësimit është i rëndësishëm. Ky proces është ligjërisht dhe politikisht detyrues dhe i nënshtrohet monitorimit dhe vlerësimit të vazhdueshëm. Kjo ofron garancinë më të fortë që natyra dhe mjedisi i Shqipërisë do të mbrohen në përputhje me standardet evropiane”, deklaroi ajo.
Komisioni Evropian kishte ngritur më herët shqetësime edhe për ndryshimet ligjore të miratuara në shkurt 2025, të cilat parashikojnë përjashtime të veçanta për investimet me vlerë mbi 50 milionë euro.
Sipas Brukselit, kjo kategori përfshin edhe projektin e mbështetur nga Affinity Partners, kompania e lidhur me Jared Kushner, e cila ka marrë akses të posaçëm nga autoritetet shqiptare.
Duke komentuar investimet e huaja, Kos tha se për Bashkimin Evropian rëndësi ka respektimi i ligjit dhe jo origjina e kapitalit.
“Lidhur me investimet e huaja, ato janë të rëndësishme për çdo vend kandidat dhe për shtetet anëtare. Për ne nuk ka aq shumë rëndësi nga vijnë, por nëse realizohen në përputhje me legjislacionin e Bashkimit Evropian”, u shpreh komisionerja.
