Shkup, 22 shtator, Zhurnal.mk – Ish-pjesëtari i Ushtrisë Çlirimtare të Kosovës (UÇK), Fadil Pushkolli, është liruar nga autoritetet e Maqedonisë së Veriut, disa orë pasi ishte ndaluar në bazë të një urdhër-arresti të lëshuar nga Serbia, transmeton Zhurnal.mk.
Lajmin për lirimin e tij e ka bërë të ditur vetë Pushkolli përmes një postimi, ku ka njoftuar se pas intervistimit dhe marrjes në pyetje nga autoritetet policore maqedonase, është lënë i lirë.
Pushkolli ka shprehur falënderim për Policinë e Maqedonisë së Veriut, duke veçuar pjesëtarët shqiptarë të policisë për, siç ka thënë ai, korrektësinë, respektin dhe profesionalizmin e treguar gjatë gjithë procedurës.
“Pas një interviste dhe marrjes në pyetje, jam liruar nga Policia e Maqedonisë së Veriut.
Dua ta falënderoj Policinë e Maqedonisë së Veriut, në veçanti pjesëtarët e policisë shqiptare, për korrektësinë, respektin dhe sjelljen e mirë gjatë gjithë procedurës.
Faleminderit për korrektësinë dhe profesionalizmin!”, ka shkruar Pushkolli.
Arrestimi i tij ishte bërë në bazë të një urdhër-arresti të lëshuar nga autoritetet serbe. Pas procedurave të zhvilluara nga autoritetet maqedonase, ai është liruar dhe aktualisht ndodhet i lirë.
