Shkup, 30 shtator, Zhurnal.mk – Kryetari i Komunës së Tetovës, Bilall Kasami, sot priti në zyrën e tij mysafirë të veçantë nga Shtetet e Bashkuara të Amerikës, z. Lee Corder dhe znj. Paula Corder.
Gjatë takimit u zhvillua një bisedë e hapur dhe miqësore, ku u shkëmbyen mendime mbi rëndësinë e bashkëpunimit, ndërtimit të urave mes njerëzve dhe institucioneve, si dhe forcimit të marrëdhënieve mes komuniteteve.
Kasami vlerësoi angazhimin e mysafirëve amerikanë në afrimin e liderëve politikë, profesionistëve, organizatave jofitimprurëse dhe institucioneve, duke e cilësuar si një kontribut të çmuar për krijimin e lidhjeve të reja dhe promovimin e dialogut.
“E vlerësoj këtë vizitë si një mundësi të mirë për të ndërtuar ura të reja bashkëpunimi dhe për të vazhduar komunikimin me miqtë tanë nga Shtetet e Bashkuara”, theksoi kryetari Kasami.
