Bruksel, 13 nëntor Zhurnal.mk – Ministria e Drejtësisë ka dorëzuar Projekt-Kodin Penal dhe Projektligjin për Procedurën Penale në Komisionin Evropian për mendim, duke vazhduar kështu procesin e reformës gjithëpërfshirëse të legjislacionit penal dhe harmonizimin e tij me standardet evropiane.
Kodi i ri Penal po përgatitet pas tri dekadash dhe, së bashku me Ligjin e ri për Procedurën Penale, synon të mundësojë luftë më efikase kundër kriminalitetit dhe korrupsionit, procedura gjyqësore më të drejta, mbrojtje më të mirë të viktimave dhe siguri më të madhe juridike për qytetarët.
Thelbi i reformës nuk qëndron vetëm në miratimin e ligjeve të reja, por edhe në zbatimin e tyre dhe në rezultatet që duhet të ndiejnë qytetarët. Qëllimi është krijimi i një kornize ligjore që do të mundësojë hetime efikase, procedura gjyqësore të drejta, zbatim të barabartë të ligjit dhe përgjegjësi pa përjashtime.
Përgatitja e Kodit të ri Penal filloi në vitin 2019, ndërsa grupi i punës, i udhëhequr nga akademiku Vlado Kambovski, gjatë periudhës 2020–2026 zhvilloi konsultime të gjera me përfaqësues të gjyqësorit, komunitetit akademik, institucioneve kompetente dhe organizatave të shoqërisë civile.
Në tekstin e propozuar janë përfshirë 33 direktiva përkatëse të Bashkimit Evropian, ndërsa gjatë konsultimeve janë shqyrtuar më shumë se 50 mendime dhe propozime.
Paralelisht është punuar edhe për Ligjin e ri për Procedurën Penale. Grupi ekspert i punës, i udhëhequr nga prof. dr. Gordana Lažetiq dhe i përbërë nga 25 anëtarë, e përfundoi përgatitjen e tekstit në tetor të vitit 2026. Propozimi parasheh harmonizimin me 25 direktiva dhe standarde përkatëse evropiane.
Ndër zgjidhjet kryesore janë avancimi i konfiskimit të pasurisë, hetimet financiare, provat elektronike, masat e posaçme hetimore, mbrojtja e viktimave, si dhe mundësia e mbajtjes së seancave gjyqësore dhe administrimit të provave në distancë.
Në përgatitjen e të dy teksteve ligjore mbështetje të rëndësishme kanë ofruar partnerët ndërkombëtarë, veçanërisht Misioni i OSBE-së në Shkup.
Me dorëzimin e propozimeve në Komisionin Evropian, Ministria e Drejtësisë vazhdon përmbushjen e obligimeve nga Agjenda e Reformave dhe harmonizimin e legjislacionit vendor me të drejtën evropiane.
Reforma e legjislacionit penal pritet të sjellë ndryshime konkrete në funksionimin e sistemit të drejtësisë. Vlera e saj e vërtetë do të dëshmohet përmes hetimeve më efikase, procedurave gjyqësore më të drejta, mbrojtjes më të fortë të të drejtave dhe sigurisë më të madhe juridike për çdo qytetar.
