sHKUP, 6 GUSHT, zHURNAL.MK – “Deklarata e ministres së Arsimit se këtë vit shkollor do të ketë të paktën 3.000 nxënës të klasës së parë më pak është vlerësimi më i rëndë për politikat e Qeverisë. Kjo nuk është vetëm statistikë, kjo është alarm se Maqedonia po zbrazet me ritme të shpejta”, thonë nga LDP.
“Ndërsa ministrja përpiqet ta paraqesë maturën shtetërore si sukses, pyetja e vërtetë është: kujt do t’i japim mësim nesër, nëse çdo vit kemi mijëra fëmijë më pak?
Nuk mund të flitet për sistem arsimor të suksesshëm kur shkollat mbeten pa nxënës, ndërsa të rinjtë e braktisin shtetin.
Rënia demografike është pasojë e drejtpërdrejtë e politikave të gabuara, pasigurisë ekonomike, mosbesimit në institucione dhe mungesës së vizionit. Çdo vit me më pak nxënës të klasës së parë do të thotë më pak të rinj, më pak fuqi punëtore dhe një e ardhme më e dobët për Maqedoninë.
Partia Liberale‑Demokratike paralajmëron se kjo nuk duhet trajtuar si një numër i zakonshëm në raport. Nevojitet strategji kombëtare urgjente për rimëkëmbje demografike dhe mbështetje për të rinjtë, si dhe miratimi i masave konkrete për krijimin e kushteve që qytetarët të qëndrojnë dhe të ndërtojnë të ardhmen e tyre në vend”, thuhet në njoftimin e LDP‑së.
