Shkup, 24 gusht, Zhurnal.mk – Për shkak të prokurorit të LSDM dhe BDI, Abazi, drejtësia për modularët nuk pa dritë të bardhë, ndërsa fakt është se Filipçe vetë i shkruante kushtet në tender, deklaroi Mile Lefkov, anëtar i Komitetit Ekzekutiv dhe deputet i VMRO‑DPMNE.
„Me mosngritjen e aktakuzës për 19 spitale modulare, drejtësia nuk pa dritë të bardhë. Kjo është falë prokurorit në largim, Islam Abazi, i cili gjatë gjithë mandatit të tij, në vend që ta ushtronte funksionin e prokurorit për ndjekjen e krimit të organizuar, edhe në fund të mandatit tregoi se kishte vetëm një qëllim, e ai ishte mbrojtja e interesave të LSDM dhe BDI. Kështu, falë këtyre veprimeve të Abazit, nga LSDM dhe vetë Venko Filipçe thonë se gjithçka ka qenë në rregull me modularët. Por se nuk është ashtu, u është e qartë të gjithëve. Opinioni dëshmoi për një sërë ekspertizash, një sërë dokumentesh që tregojnë se për ndërtimin e spitaleve nuk ishte kërkuar asnjë kusht sipas Ligjit për ndërtim, por i vetmi ligj në atë kohë ishte vullneti i Filipçes. Dhe pikërisht për këtë, rezultati nga një spital modular ishte fakti i ashpër – u dogjën 14 pacientë“, tha Lefkov.
Ai pretendon se Filipçe në procedurat shkonte deri aty sa të bënte anekse për rritjen e çmimit të modularëve, kërkonte nga organet kompetente vetëm të nënshkruanin dokumentet që ai u dorëzonte, pa i lënë të punonin sipas ligjit.
„Për këtë dëshmon deklarata e një punonjësi në Ministrinë e Shëndetësisë, i cili në dëshmi para prokurorisë ka deklaruar, citoj: ‘Dua të sqaroj se nuk e kam përgatitur specifikimin teknik, por vetëm e kam përcjellë me urdhër të ministrit Filipçe te ministri i Punës dhe Politikës Sociale’. Pra Filipçe, duke ndjekur interesat personale dhe partiake, nuk ishte i interesuar as për atë që thoshin ekspertët. E sot del në publik dhe mburret se ka vepruar drejt prokurori i LSDM dhe BDI. Por Filipçe duhet ta ketë parasysh se me një provë të re mund të fillojë përsëri procedura për të njëjtën vepër. Ndërsa qytetarët, familjet e viktimave kanë të drejtë në drejtësi“, tha Lefkov.
