Shkup, 9 korrik, Zhurnal.mk – “Problemi është te pushteti dhe te Hristijan Mickoski, i cili ngulmë këmbëngul në zgjidhje që hapin hapësirë për keqpërdorime zgjedhore. LSDM nuk do të lejojë grabitje zgjedhore. Do ta mbrojmë votën e çdo qytetari, do t’i kundërvihemi çdo përpjekjeje për manipulim dhe do ta mbrojmë vullnetin e lirë të qytetarëve”, thuhet në reagimin e LSDM‑së ndaj deklaratës së sotme të Mickoskit.
“Duam të mos i vjedhësh votat e qytetarëve në zgjedhje, përmes diasporës”, thuhet në reagimin e Lidhjes Socialdemokrate të Maqedonisë (LSDM) ndaj deklaratës së kryeministrit Hristijan Mickoski, i cili e ftoi opozitën të mos e bllokojë miratimin e Kodit Zgjedhor dhe të dalë me propozim konkret.
“Mickoski thotë të themi çfarë duam për Kodin Zgjedhor, ai do ta pranojë. Po themi: duam të mos i vjedhësh votat e qytetarëve në zgjedhje, përmes diasporës. Sepse u konfirmua se Mickoski dhe VMRO‑ja nuk kanë as interes për reforma, as për përmirësimin e Kodit Zgjedhor, as për konsensus politik. Qëllimi i tyre është vetëm një – grabitje zgjedhore. Gjithçka tjetër janë gënjeshtra, justifikime dhe spinime me të cilat përpiqen ta fshehin të vërtetën”, thuhet në reagimin e opozitës.
Nga LSDM përsërisin se kryeministri Mickoski fillimisht, me forcë, pa konsensus politik dhe në kundërshtim me praktikat demokratike, e ka shfuqizuar qeverinë teknike 100 ditë para zgjedhjeve, ndërsa tani përpiqet të “shtyjë” një model për votim elektronik të diasporës pa mekanizma të mjaftueshëm kontrolli dhe garancie për integritetin zgjedhor.
Pasi ai propozim nuk kaloi, thonë nga LSDM, Mickoski ka propozuar një model të ri – votim të diasporës me postë, që sipas socialdemokratëve sërish nuk garanton kontroll dhe mekanizma që sigurojnë shprehjen e lirë të vullnetit të qytetarëve.
Për më tepër, LSDM thotë se Mickoski fillimisht ka deklaruar se pranon ndryshimin e modelit zgjedhor me një njësi të vetme zgjedhore, ndërsa tani kërkon, siç thonë ata, që dikush tjetër të merret vesh për këtë çështje.
“Vetëm gënjeshtra dhe spinime, pas të cilave fshihet kërkimi i mënyrës për të manipuluar me rreth 200.000 vota të diasporës. Ndërkohë, agjendën reformuese e përdor vetëm si justifikim dhe alibi për paaftësinë e tij për të realizuar detyrimet e procesit të integrimit evropian”, thonë nga LSDM.
Në këtë kontekst, partia akuzon se i vetmi fajtor pse nuk ka konsensus për Kodin Zgjedhor është kryeministri Hristijan Mickoski dhe se problemi nuk qëndron te opozita.
“Problemi është te pushteti dhe te Hristijan Mickoski, i cili ngulmë këmbëngul në zgjidhje që hapin hapësirë për keqpërdorime zgjedhore. LSDM nuk do të lejojë grabitje zgjedhore. Do ta mbrojmë votën e çdo qytetari, do t’i kundërvihemi çdo përpjekjeje për manipulim dhe do ta mbrojmë vullnetin e lirë të qytetarëve”, porosit opozita.
Duke iu përgjigjur pyetjeve të gazetarëve gjatë vizitës së sotme në Manastir, Mickoski tha se shumica qeverisëse ka tentuar të ofrojë një propozim që fillimisht ishte pranuar, së bashku me të gjitha ndryshimet që përmbajnë rekomandimet e OSBE/ODIHR‑it, dhe se ligji ishte nënshkruar dhe gjithçka ishte e përfunduar. Por, sipas tij, nga Levica, edhe pse fillimisht ishin dakord, tani po bëjnë “teatër” për numrin e vogël të votuesve që ende u besojnë, dhe se pretendimet e tyre nuk kanë asnjë lidhje me të vërtetën.
