Shkup, 13 tetor Zhurnal.mk – Për këtë vit, Ministria e Mbrojtjes ka në dispozicion një buxhet rekord prej 358 milionë eurosh. Të dhënat zyrtare tregojnë se në disa kazerma në qytete të ndryshme të vendit po punohet me intensitet të lartë.
Shpesh, ministri aktual i Mbrojtjes, Vlado Misajlovski, mund të shihet duke vizituar objektet, i shoqëruar nga një delegacion, për të inspektuar aktivitetet infrastrukturore. Nga këto vizita publikohen fotografi që tregojnë ecurinë e punimeve dhe investimet për përmirësimin e standardeve të ushtarëve.
Por kjo është vetëm njëra anë e medaljes. Ana tjetër paraqet një realitet krejtësisht të ndryshëm. Redaksia e „Fokus“ disponon fotografi të shumta që tregojnë kushtet në të cilat funksionojnë ushtarët, mënyrën se si lahen në kova plastike me kapakë të shpuar, si ushqehen dhe çfarë ushqimi u ofrohet. Këto pamje, sipas mediumit, dëshmojnë për një gjendje alarmante në një ushtri që është pjesë e NATO-s.
Një pjesë e fotografive tregojnë se ushtarët ushqehen në kushte katastrofike, edhe pse jemi në shekullin XXI. Ushqimi transportohet në bidonë të ndotur, disa prej të cilëve janë dekada të vjetër, të ndryshkur dhe me goma të kalbura. Pikërisht në këto kushte ruhet ushqimi që konsumojnë ushtarët.
Por problemet nuk përfundojnë këtu. Edhe më shqetësuese paraqitet gjendja në tualete, ku shihen rezervuarë të ndryshkur, pllaka të pista dhe të thyera, si dhe mure të nxira.
„Fokus“ disponon gjithashtu fotografi nga tualete ku në mur është vendosur një njoftim se uji nuk është i pijshëm. Sipas informacioneve të mediumit, kjo situatë paraqitet në shumicën e kazermave në vend. Madje, pretendohet se ka pasur kazerma ku uji ka qenë i papërshtatshëm për përdorim për më shumë se 35 vjet.
Për këtë temë, „Fokus“ ka biseduar me disa ushtarë, të cilët kanë folur hapur për kushtet në të cilat punojnë dhe kryejnë detyrat e tyre.
„Deri kur do të fotografoheni dhe do të shëtisni nëpër takime pa asnjë rezultat? Kjo është pyetja që shtrojnë të gjithë pjesëtarët e Armatës. Deri kur pjesëtarët e një ushtrie që është anëtare e NATO-s do të ushqehen në kushte të tilla, siç shihen në fotografi? Deri kur do t’i manipuloni pjesëtarët e Armatës dhe do ta gënjeni opinionin se diçka po ndryshon?
Është e dhimbshme ajo që po ndodh. Gjendja ka arritur në pikën më të ulët. Në shekullin XXI punojmë në kushte që cenojnë çdo dinjitet njerëzor. Ushqimi është katastrofë, ndërsa vendet ku lahemi janë në gjendje të mjerueshme. Për t’u larë përdorim një kovë të zakonshme me kapak të shpuar.
Paramendoni, ne jemi ata që kujdesemi për sigurinë e shtetit. Dhe më e dhimbshmja është se askujt nuk i intereson. Ata vazhdojnë me propagandën e tyre, ndërsa ne jetojmë në mjerim të vërtetë“, deklarojnë për „Fokus“ ushtarë që kanë kërkuar të mbeten anonimë.
Nga ana tjetër, Ministria e Mbrojtjes mban një qëndrim krejtësisht të kundërt. Prej atje thonë se për kushtet në objektet e Armatës informojnë rregullisht dhe në mënyrë të detajuar.
„Është e vërtetë se ekzistojnë objekte ushtarake që për më shumë se gjysmë shekulli janë lënë në mëshirë të kohës. Megjithatë, këtë gjendje po e ndryshojmë çdo ditë. Investimet prej mbi 3 milionë eurosh gjatë këtij viti dhe plani për investimin e 12 milionë eurove shtesë në rindërtimin e infrastrukturës ushtarake dëshmojnë se po punohet seriozisht për rikonstruktimin dhe rinovimin e të gjitha kazermave të Armatës.
Gjatë periudhës së kaluar, ministri Misajlovski ka vizituar disa kazerma dhe objekte ku po zhvillohen punime të plota rikonstruktimi, përfshirë kazermat në Veles, Shtip, Prilep dhe Shkup.
Po investohet në rregullimin e plotë të ambienteve të brendshme, duke përfshirë nyjet sanitare, zëvendësimin e instalimeve elektrike, ndriçimin, sistemet e ventilimit dhe ngrohjes, dyshemetë, si dhe punimet e lyerjes dhe ngjyrosjes.
Në infrastrukturën ushtarake po punohet si asnjëherë më parë dhe kjo mbetet një nga prioritetet tona. Të gjitha këto ndërhyrje infrastrukturore realizohen në përputhje me prioritetet e Armatës“, thuhet në përgjigjen zyrtare të Ministrisë së Mbrojtjes.
