Kumanovë, 17 maj Zhurnal.mk – Do të ketë më pak pemë vendore në treg, pasi ngricat pranverore në pjesën lindore dhe verilindore të vendit kanë shkatërruar një pjesë të madhe të prodhimit. Më të goditur janë prodhuesit e qershive, kajsive dhe arrave. Pothuajse i gjithë prodhimi i varieteteve të hershme është dëmtuar, vetëm pak javë para korrjes.
Pemëtari Çedo nga fshati Kosmatec i Kumanovës tashmë prej disa vitesh përballet me dëme të mëdha. Edhe këtë vit ngricat ia shkatërruan pjesën më të madhe të pemishtes, ku kultivon 11 mijë qershi dhe mbi 2 mijë kajsi. Ai kishte pritur një vit të suksesshëm me mbi 200 tonë prodhim, me të cilin do të furnizonte rajonin.
“Dëmi është shumë i madh, as vetë nuk di të them sa është. Mjafton që ngrica, 20 ditë para korrjes, na shkatërroi gjithçka. Vitin e kaluar ngricat gjatë lulëzimit na dëmtuan 100 për qind, nuk kishte as kajsi, pothuajse asgjë. Këtë vit dukej shumë mirë, kishte prodhim të madh, por ngrica bëri problem serioz. Madje po mendoja si do ta shisja prodhimin”, tha Çedo Angellovski, pemëtar nga Kosmateci i Kumanovës.
Ai thekson se këtë herë nuk ka pasur mundësi ta mbrojë prodhimin, pasi parashikimet e motit kanë dështuar.
Pasojat nga ngricat pranverore nuk do t’i ndjejnë vetëm pemëtarët. Ato pritet të reflektohen edhe në treg, ku oferta do të jetë më e vogël, ndërsa çmimet e frutave mund të rriten.
Nga Komisioni për vlerësimin e dëmeve nga fatkeqësitë natyrore në Komunën e Kumanovës konfirmojnë se gjatë kësaj periudhe kanë pranuar disa paraqitje për dëme në sipërfaqet bujqësore, të cilat janë në proces shqyrtimi. Vitin e kaluar janë evidentuar 14 raste të tilla.
