Tiranë, 27 maj, Zhurnal.mk – Me kërkesë të Prokurorisë pranë Gjykatës së Shkallës së Parë të Juridiksionit të Përgjithshëm Sarandë, është dhënë masa e sigurisë “Arrest me burg” për shtetasin francez Z.K., i dyshuar për veprën penale “Mashtrimi kompjuterik”,.
Sipas organit të akuzës dyshohet se shtetasi francez, në bashkëpunim me persona të tjerë, ka përvetësuar të dhëna bankare të qytetarëve shqiptarë përmes përdorimit të kartave SIM të regjistruara me identitete të tjera dhe dërgimit masiv të mesazheve mashtruese.
Mesazhet mbanin përmbajtjen: “POSTA SHQIPTARE: Paketa juaj AL91359200 i nënshtrohet tarifave doganore (55 ALL). Ju lutemi, konfirmoni dorëzimin në: https://aktivpostalb.com”.
Sipas hetimeve, përmes kësaj skeme synohej që qytetarët të klikojnë lidhjen elektronike dhe të japin të dhënat e tyre bankare, të cilat më pas përdoreshin për përfitime të paligjshme.
Prokuroria bëri të ditur se dje, me kërkesë të saj, Gjykata e Shkallës së Parë e Juridiksionit të Përgjithshëm Sarandë vendosi masën e sigurimit personal me karakter shtrëngues “Arrest në burg”.
