Tiranë, 17 nëntor Zhurnal.mk – Informacioni dhe komunikacioni është një nga aktivitetet që lidhet drejtpërdrejt me zhvillimin digjital të ekonomisë, por në Shqipëri vlera e krijuar prej tij është e përqendruar kryesisht në Tiranë.
Sipas të dhënave të INSTAT-it për vitin 2024, qarku Tiranë gjeneron 83.5% të vlerës së shtuar bruto të këtij sektori në shkallë kombëtare, ndërsa 11 qarqet e tjera së bashku krijojnë vetëm 16.5%.
Diferenca me qarqet e tjera është e konsiderueshme. Durrësi renditet i dyti, me 4.09% të vlerës së shtuar kombëtare të sektorit, i ndjekur nga Shkodra me 2.66% dhe Fieri me 2.33%.
Në këtë grup aktivitetesh përfshihen programimi kompjuterik, shërbimet e teknologjisë së informacionit, telekomunikacionet, botimet dhe veprimtaritë mediatike. Pra, bëhet fjalë për një sektor më të gjerë sesa industria e teknologjisë në kuptimin e ngushtë.
Megjithatë, pesha e informacionit dhe komunikacionit në ekonominë shqiptare mbetet relativisht e kufizuar. Në vitin 2024, ky sektor përfaqësonte 2.8% të vlerës së shtuar bruto kombëtare, ndërsa në qarkun Tiranë pesha e tij arrinte në pothuajse 5%.
Rëndësia e sektorit shkon përtej kontributit të drejtpërdrejtë ekonomik. Shërbimet digjitale, programimi dhe telekomunikacionet mbështesin funksionimin e bizneseve, modernizimin e proceseve të punës dhe zhvillimin e aktiviteteve të tjera ekonomike.
Përqendrimi i lartë në Tiranë nxjerr në pah edhe dallimet territoriale në strukturën e ekonomisë. Ndërsa kryeqyteti mbizotëron në aktivitetet e informacionit dhe komunikacionit, pjesa tjetër e vendit ka një prani shumë më të kufizuar në krijimin e vlerës së shtuar të këtij sektori.
Në vendet e Ballkanit Perëndimor, informacioni dhe komunikacioni ka peshë të ndryshme në ekonomi. Në vitin 2024, ky sektor përbënte 9.9% të vlerës së shtuar bruto në Serbi, 5.8% në Maqedoninë e Veriut, 5.6% në Bosnje Hercegovina, 5.4% në Malin e Zi dhe 2.5% në Kosovë, kundrejt 2.8% në Shqipëri. Megjithatë, përqendrimi në kryeqytet nuk është karakteristikë vetëm e Shqipërisë./ Scantv.al

