Shkup, 8 qershor, Zhurnal.mk – Jeta në Maqedoni po bëhet gjithnjë e më e shtrenjtë. Çmimet po rriten, ndërsa pagat mbeten të njëjta. Enti Shtetëror i Statistikës ka regjistruar rritje të shpenzimeve të jetesës në muajin maj prej 4,8% krahasuar me të njëjtën periudhë të vitit të kaluar, raporton Alsat, transmeton Zhurnal.
Rritje të ndjeshme të shpenzimeve Enti ka evidentuar te ushqimi dhe pijet joalkoolike me 4,7%, pijet alkoolike dhe duhani me 9,3%, transporti me 11%, ndërsa shpenzimet për aktivitete sportive dhe kulturore janë rritur për 5,5%. Rritje më të konsiderueshme qytetarët kanë edhe gjatë blerjes së perimeve me pothuajse 7%, si dhe gjatë vizitave në restorante dhe hotele me 5%.
Vizard- Enti shtetëror i statistikave
Ushqim dhe pije joalkoolike 4,7%
Pije alkoolike dhe duhani 9,3%
Transport 11%
Rekreacion, sport dhe kulturë 5,5%
Restorant dhe shërbime akomodimi 5,0%
Produkte bujqësore 6,7%
Orendi, pajisje për amvisëri 4,6%
Shërbime për arsim 4,6%
Qytetarët ankohen se janë sjellë në prag të varfërisë, thonë se çdo ditë përballen me vështirësi për ta kaluar ditën, ndërsa sipas të moshuarve, nëse nuk do t’u ndihmonin fëmijët e tyre, nuk do të mund ta përballonin muajin.
„Do të thosha se në Maqedoni çmimet janë shumë të larta. Kur e krahason me Europën, këtu është më shtrenjtë se në Europë. Nuk e di si ia dalin qytetarët me pagë prej 300–400 euro, nuk e di si mund të mbijetojnë. Nuk di çfarë të them, nuk kam koment,“ tha një qytetar.
„Çfarë të them, katastrofë. Jetë e vështirë, stres, gjithçka është bërë shumë e shtrenjtë, ky popull nuk ka para,“ u shpreh një qytetare.
„Shumë vështirë, shumë vështirë. Me ndihmën e fëmijës, nga njëri e nga tjetri, disi e përballoj, përndryshe jo,“ tha një tjetër qytetar.
Nga Enti i Statistikës kanë llogaritur gjithashtu se në nivel mujor është shënuar rritje minimale të inflacionit prej 0,6%.
