Shkup, 13 shtator Zhurnal.mk – Rritja e numrit të studentëve në Universitetin “Nënë Tereza” në Shkup ka nxjerrë në pah mungesën e hapësirave të mjaftueshme për zhvillimin e procesit mësimor, ndërsa kampusi i ri universitar ende nuk është ndërtuar.
Përballë kësaj situate, Rektorati i UNT-së ka kërkuar ndihmën e institucioneve qeveritare për renovimin dhe përshtatjen e objekteve ekzistuese.
Rektori i Universitetit “Nënë Tereza”, Bekim Fetahu, thotë se hapësirat aktuale nuk i plotësojnë nevojat e universitetit dhe se deri në ndërtimin e kampusit të ri duhet të gjendet një zgjidhje e përkohshme.
“Një nga fakultetet duhet të rialokohet në një objekt tjetër për një periudhë të pacaktuar, derisa të ndërtohet kampusi i ri universitar”, ka deklaruar Fetahu.
Sipas Rektoratit, rritja e interesimit dhe e numrit të studentëve e ka bërë edhe më urgjente çështjen e hapësirave. Për këtë arsye, kërkohet ndërhyrje institucionale për renovimin dhe përshtatjen e objekteve ekzistuese, deri në realizimin e kampusit të ri të UNT-së.
