Strugë, 1 mars – Zëvendësministri i Bujqësisë, Albrim Hoxha, ka vizituar fermën e Ferit Biçakut në fshatin Zagraçan të Strugës, duke vlerësuar përkushtimin dhe pasionin e tij në prodhimin organik.
Biçaku është një shembull i fermerit që nuk ankohet, por punon çdo ditë me përgjegjësi, duke ndërtuar një aktivitet të certifikuar dhe cilësor.
Hoxha theksoi se mbështetja e fermerëve lokalë është thelbësore për sigurinë ushqimore, zhvillimin e zonave rurale dhe rritjen e besimit te produkti vendas. “Fermerë si Ferit Biçaku janë garanci se prodhimi vendas mund të jetë i qëndrueshëm, i shëndetshëm dhe i besueshëm për konsumatorët”, shkroi ai në Facebook.
Kjo vizitë është mesazh i qartë se politika bujqësore po orientohet drejt forcimit të prodhimit organik dhe mbështetjes së fermerëve lokalë, duke i dhënë prioritet cilësisë dhe zhvillimit të qëndrueshëm.
