Tetovë, 22 shkurt – Komuna e Tetovës ende nuk ka miratuar Planin gjeneral urbanistik, edhe pse kreu i komunës, Bilall Kasami premtoi se brenda 6 muajve të mandatit të parë ai do jetë gati.
Kasami tha se Plani gjeneral urbanistik është në përpilim dhe detyra projektuese është në Agjencionin për Planifikim në procedurën e miratimit.
“Dinamikën të cilën e kemi paraparë besojmë që brenda 2026 do kemi draftin e parë të dorëzuar në ministri që pastaj vazhdon koordinimi me ta për vërejtjet e tyre”, u shpreh Kasami.
Edhe Kodra e Diellit ka vite që e pret miratimin e Planit të Detajuar Urbanistik, por ai po zvaritet. Kasami arsyeton se ka interesim nga një investitor i huaj, dhe plani duhet të shihet në bazë të kërkesave dhe interesave të tij, duke shtuar se investitori nuk është kompania italiane “TechnoAlpin”, por “EMAAR Group” nga Emiratet e Bashkuara Arabe.
“Investitori nga Tiroli Lindor që është zonë në veriun e Italisë, nuk është që janë ndërprerë bisedimet. Ndërkohë, ka shprehur interes një investitor më serioz që është një nga investitorët më të rëndësishëm, bëhet fjalë për pronarin e ‘EMAAR Group’, Muhamed Alabbar, që është nga Emiratet e Bashkuara Arabe dhe i cili ka ardhur ka vizituar Kodrën e Diellit dhe i cili para vitit të ri diku brenda dhjetorit ka qenë në vizitën e dytë në RMV. Tani në Davos kryeministri ka pasur edhe takimin e radhës dhe ne presim projekt investues konkret nga investitori në fjalë dhe interesimin e tij për Kodrën e Diellit”, ka theksuar Kasami.
Përndryshe, edhe Ministria e Transportit dhe Lidhjeve nuk e ka pranuar PDU e Kodrës së Diellit dhe ka pasur disa vëretje dhe ai i është kthyer komunës për korrigjim.
Por për invesitor të huaj ka folur edhe kryeministri Hristijan Mickoski, gjatë vizitës së tij në Kodrën e Diellit, tha se po bisedohet për të arritur një marrëveshje me investitorin, që do të mundësonte funksionimin e pikës turistike gjatë gjithë vitit, jo vetëm sezonit dimëror.
