Kumanovë, 22 shkurt – Deponive të egra në Kumanovë assesi t’u vie fundi. Edhe përkundër aksioneve të shumta për pastrimin e tyre, pas një kohe të shkurtër ato sërish krijohen. Gjatë javës që lam pas ekipet e ndërmarrjes publike “Pastrim dhe Gjelbërim” pastruan një nga deponitë e egra në qytet, atë tek ura dhe përgjatë lumit të Kumanovës.
“U bëj thirrje të gjithë qytetarëve që të përmbahen nga hudhja e mbeturinave në shtratin e lumit për të mbrojtur mjedisin jetësor por dhe faktorin njeri. Ekipet tona po punojnë intenzivisht. Jemi dakorduar që të vendosim një gardh mbrojtës në të dyja anët e lumit me qëllim që të parandalojmë hedhjen e vazhdueshme në lumë dhe për skaj lumit. Hudhja e pakontrolluar e mbeturinave po ndodh përsëri dhe vazhdimisht në të njëjtat vende. Tani për tani e pastruam, nuk është në një sasi kaq alarmante, nuk është siç ishte para se të pastronim ato deponi të paligjshme, por u bëjmë thirrje qytetarëve që të përmbahen nga hudhja e mbeturinave në vendet publike dhe jo adekuate. Kemi shumë deponi të paligjshme në qytet dhe gjatë kësaj periudhe do t’i pastrojmë të gjitha”, – deklaroi Sasho Tomiq, drejtor i N.P. Pastrim dhe Gjelbërim në Kumanovë.
Autoritetet vazhdimisht u bëjnë apel qytetarëve që të përmbahen nga hudhja e mbeturinave në lumë dhe vendet e ndaluara dhe jo adekuate.
Ndryshe N.P. “Pastrim dhe Gjelbërim”, vijon me aksione të këtilla në të gjithë territorin e qytetit, por si duket qytetarë të pa përgjegjshëm, hudhin mbeturina ku të arrijnë, duke e ndotur kështu ambinetin.
