Shkup, 06 Maj, Zhurnal.mk – Sipas një analize të re të përgatitur nga UNICEF dhe Ministria e Politikës Sociale, Demografisë dhe Rinisë e Maqedonisë së Veriut, çdo i treti fëmijë në Maqedoninë e Veriut është i ekspozuar ndaj rrezikut të varfërisë, shkruan Zhurnal.mk
Përfaqësesja e zyres së UNICEF në Shkup, Lesli Miller, tha sot në një konferencë, se rreziku i varfërisë te fëmijët nuk është vetëm çështje sociale, por edhe zhvillimore, pasi ndikon drejtpërdrejt në arsimin, shëndetin dhe perspektivën afatgjatë të tyre.
“Qëndrueshmëria demografike nënkupton krijimin e kushteve në të cilat familjet kanë mundësi të rrisin fëmijë me siguri, dinjitet dhe besim në të ardhmen”, tha zonja Miller.
UNICEF tha se së bashku me Ministria e Politikës Sociale, Demografisë dhe Rinisë e Maqedonisë së Veriut dhe partnerët, po diskutojnë se si “reformat në mbrojtjen sociale mund të kontribuojnë më mirë në uljen e varfërisë së fëmijëve, mbështetjen e punësimit të grave dhe forcimin e kapitalit njerëzor.”
Sipas të dhënave të UNICEF the ministrisë, rreth “120.000 fëmijë në vend ende janë të ekspozuar ndaj rrezikut të varfërisë – veçanërisht fëmijët nga familjet me shumë anëtarë, familjet rome dhe familjet me një prind,” tha UNICEF në një komunikatë.
Analiza e paraqitur sot i bën thirrje institucioneve që të forcojnë politikat sociale, të zgjerojnë ndihmën për familjet në nevojë dhe të krijojnë mekanizma më efektivë për uljen e pabarazive sociale, veçanërisht te grupet më të ndjeshme. /Zhurnal.mk
