Tiranë, 20 maj, Zhurnal.mk – Kryetarja e Autoritetit të Mediave Audiovizive, Armela Krasniqi priti në takim në AMA, Përfaqësuesin e OSBE-së për Lirinë e Medias, Ambasadorin Jan Braathu.
Në takim ishin të pranishëm edhe zëvendëskryetarja e Prezencës së OSBE-së në Shqipëri, Clarisse Pasztory, Këshilltarja Kryesore e Përfaqësuesit të OSBE-së për Lirinë e Medias, Barbara Trionfi, shefi i Departamentit të Demokratizimit pranë Prezencës së OSBE-së në Shqipëri, Dane Koruga, si dhe Sekretari i Lartë i Përfaqësuesit të OSBE-së për Lirinë e Medias, Adis Mustedanagic.
Gjatë takimit, Krasniqi iu përgjigj interesit të Braathu mbi rolin e AMA-s si ent rregullator, transparencën e pronësisë së medias, qasjen ndaj publikut dhe mekanizmat administrativë e ligjorë që garantojnë trajtimin e ankesave të ardhura nga qytetarët dhe grupet e interesit për përmbajtjet audiovizive.
Gjithashtu, Krasniqi e informoi edhe lidhur me rolin e AMA-s në garantimin e balancës ndërmjet lirisë së shprehjes dhe mbrojtjes së publikut nga përmbajtjet e dëmshme.
Palët diskutuan edhe mbi bashkëpunimin e vendosur nga AMA me TikTok dhe X për raportimin dhe trajtimin e përmbajtjeve të dëmshme në këto platforma, si një praktikë bashkëkohore që reflekton përgjegjësinë institucionale të rregullatorit në raport me sfidat e reja të ekosistemit mediatik dhe zhvillimet e kuadrit europian në fushën digjitale.
Ambasadori Braathu vlerësoi progresin e arritur nga AMA në drejtim të forcimit të standardeve të shtetit të së drejtës dhe lirisë së shprehjes, duke theksuar se eksperienca e rregullatorit shqiptar përbën një model të rëndësishëm reference për rregullatorët e vendeve të Europës Juglindore.
OSBE është një ndër partnerët strategjikë të AMA-s në forcimin e standardeve demokratike, lirisë së shprehjes dhe konsolidimit të një mjedisi mediatik të pavarur, transparent dhe në përputhje me standardet europiane.
