Tetovë, 22 korrik Zhurnal.mk – Kryetari i Bashkimit Demokratik për Integrim (BDI), Ali Ahmeti, ka pritur në takim Ambasadorin e Austrisë në Republikën e Maqedonisë së Veriut, Martin Pammer, me të cilin ka biseduar për zhvillimet politike në vend dhe perspektivën evropiane të shtetit.
Sipas Ahmetit, gjatë takimit është zhvilluar një bisedë e hapur dhe e frytshme mbi sfidat me të cilat përballet vendi dhe përgjegjësinë e institucioneve në procesin e integrimit evropian.
Ai ka ritheksuar se rruga e Maqedonisë së Veriut drejt anëtarësimit në Bashkimin Evropian mbetet orientimi strategjik i vendit dhe se nuk ekziston alternativë tjetër.
Ahmeti ka theksuar se avancimi i procesit eurointegrues kërkon respektimin e Marrëveshjes së Ohrit, forcimin e sundimit të ligjit, funksionimin e institucioneve mbi parimet e barazisë dhe demokracisë, si dhe përmbushjen e të gjitha obligimeve që burojnë nga procesi i anëtarësimit në BE.
Në të njëjtën kohë, ai ka vlerësuar se marrëdhëniet e mira ndëretnike, politika e fqinjësisë së mirë dhe zhvillimi i një ekonomie që garanton mirëqenie për qytetarët përbëjnë shtyllat kryesore mbi të cilat duhet të ndërtohet e ardhmja evropiane e Maqedonisë së Veriut.
“Vetëm duke ruajtur këto vlera, Maqedonia e Veriut mund të ecë përpara me siguri, stabilitet dhe dinjitet”, ka theksuar Ahmeti pas takimit me ambasadorin austriak.
