Shkup, 20 gusht, Zhurnal.mk – Ministri i Drejtësisë, Jeton Shasivari, realizoi takim me ambasadorin e Republikës së Francës në Maqedoninë e Veriut, Christophe Le Rigoler, ku u konfirmuan bashkëpunimi i shkëlqyer dhe përkushtimi i përbashkët për avancimin e sundimit të ligjit dhe integrimin evropian të vendit.
Ministri Shasivari theksoi gatishmërinë e plotë të Ministrisë së Drejtësisë për zbatimin e përshpejtuar të reformave në përputhje me rekomandimet e Komisionit Evropian dhe detyrimet e lidhura me Klasterin 1 – Vlerat Fundamentale.
„Franca është partner i rëndësishëm në procesin e integrimit evropian. Ne mbetemi plotësisht të përkushtuar ndaj reformave në fushën e sundimit të ligjit dhe përmbushjes së standardeve evropiane“, porositi ministri Shasivari.
U veçua mbështetja franceze përmes angazhimit ekspert të Cécile Maroni, e cila ofron mbështetje profesionale për Ministrinë e Drejtësisë në procesin e integrimit evropian.
Në takim u diskutua edhe për bashkëpunimin në fushën e drejtësisë klimatike dhe mjedisore, në kuadër të projektit rajonal „Konvergjenca e drejtësisë klimatike dhe mjedisore“ (CEJ Convergence).
Mbështetja e vazhdueshme ekspertize dhe institucionale do të kontribuojë në krijimin e një sistemi gjyqësor më efikas dhe më të qasshëm për qytetarët.
