Shkup, 20 gusht, Zhurnal.mk – Ministria e Financave dhe Enti Shtetëror i Revizionit po avancojnë bashkëpunimin dhe koordinimin ndërinstitucional me qëllim ndërtimin e një sistemi më të sigurt, më efikas dhe më të përgjegjshëm të financave publike. Sot ministrja e Financave Gordana Dimitrieska‑Koçoska dhe kryerevizori shtetëror Maksim Aceski nënshkruan memorandum bashkëpunimi mes dy institucioneve.
Ministrja Dimitrieska‑Koçoska theksoi se nënshkrimi i Memorandumit me Entin Shtetëror të Revizionit forcon partneritetin që bashkon kapacitetet ekspertize, teknike dhe analitike të dy institucioneve kyçe në mbrojtjen e parave të qytetarëve dhe krijon bazë më të fortë institucionale për veprim të përbashkët në parandalimin dhe zbulimin e parregullsive, mashtrimeve dhe veprimeve korruptive.
„Ministria e Financave dhe Enti Shtetëror i Revizionit konfirmojnë përcaktim të qartë politik dhe profesional për institucione të forta, menaxhim të përgjegjshëm me mjetet publike dhe tolerancë zero ndaj korrupsionit. Ky partneritet nuk është vetëm hap administrativ, por reformë thelbësore që jep bazë për koordinim më të mirë, transparencë më të madhe dhe mbrojtje më efikase të mjeteve publike. Detyra jonë është që çdo denar nga buxheti vendor, si dhe çdo euro nga fondet evropiane, të shpenzohet ligjërisht, me destinim, me përgjegjësi dhe në interes të qytetarëve“, theksoi ministrja.
„Nënshkrimi i këtij Memorandumi paraqet vendosje të një sistemi pa kompromis të sinergjisë institucionale, e cila përmes zbatimit konkret të standardeve ndërkombëtare të revizionit dhe operacionalizimit të rrjetit AFKOS garanton se çdo denar i tatimpaguesve është i mbrojtur nga parregullsitë dhe mashtrimet. Me këtë bashkëpunim, ne jo vetëm që e ngremë transparencën dhe llogaridhënien në nivelin më të lartë sipas vlerave evropiane, por drejtpërdrejt e përmirësojmë cilësinë e shërbimeve për qytetarët, duke siguruar që mjetet e tatimpaguesve të përdoren me destinim për ofrimin e shërbimeve cilësore, të përkohshme dhe të vazhdueshme“, deklaroi kryerevizori shtetëror Aceski.
Iniciativa për Memorandumin e bashkëpunimit mes dy institucioneve është rezultat i praktikës së mirë në vendet anëtare të Bashkimit Evropian dhe vendos kornizë për bashkëpunim në disa fusha me interes të përbashkët, mundëson shkëmbim përvojash, njohurish dhe të dhënash, avancim të kapaciteteve profesionale dhe zbatim të standardeve evropiane.
Memorandumi do t’u mundësojë dy institucioneve shkëmbim njohurish dhe përvojash përmes takimeve të punës, punëtorive, konferencave, seminareve, trajnimeve dhe formave të tjera të përmirësimit profesional. Punonjësit e Entit Shtetëror të Revizionit do të mund të përfshihen si ligjërues në trajnimet që i organizon Ministria e Financave përmes Sektorit – Akademia për Financa Publike, ndërsa ekspertët e Ministrisë së Financave do të kontribuojnë në programet e përmirësimit profesional të vazhdueshëm të punonjësve të Entit Shtetëror të Revizionit. Është paraparë edhe shkëmbim i rregullt i literaturës profesionale, standardeve kontabël dhe revizore, udhëzuesve metodologjikë, programeve vjetore për aktivitete revizore, si dhe raporteve përfundimtare të revizionit dhe planeve të veprimit të përgatitura nga subjektet publike.
