Tiranë, 8 shtator, Zhurnal.mk – Presidenti Bajram Begaj, në një mesazh në nisje të sesionit të ri parlamentar, bëri sot thirrje për bashkëpunim, angazhim dhe dialog.
Presidenti Begaj u shpreh se edhe kur ka dallime, palët duhet të jenë në gjendje të punojnë së bashku për atë që është në interes të vendit.
“Mandatet dhe bindjet politike janë të ndryshme, por përgjegjësia ndaj Shqipërisë është e përbashkët. Uroj që ky sesion parlamentar të jetë një periudhë bashkëpunimi në shërbim të Shqipërisë dhe të gjithë qytetarëve të saj: një sesion që afron Shqipërinë me Bashkimin Evropian, që forcon institucionet, që forcon besimin e qytetarëve te politika dhe shteti”, u shpreh Kreu i Shtetit në mesazhin e tij.
Hapja e sesionit të ri parlamentar, për Presidentin Begaj, “është një moment për të reflektuar mbi rezultatet, për të identifikuar sfidat prioritare dhe për të programuar në mënyrë më efektive e institucionale punën e ardhshme”.
“Shqipëria është sot një vend me ambicie të mëdha dhe me një shoqëri që merr pjesë gjithnjë e më shumë në jetën publike. Qytetarët shprehen më hapur për pritshmëritë, shqetësimet dhe kërkesat e tyre. Kjo është pjesë e vitalitetit të një shoqërie demokratike dhe një tregues se demokracia jonë vazhdon të zhvillohet”, tha Begaj.
Në këtë kuptim, Presidenti theksoi se protesta paqësore dhe shprehja e lirë e mendimeve janë pjesë e natyrshme e jetës demokratike.
“Jo gjithmonë do të kemi të njëjtat qëndrime dhe jo çdo kërkesë mund të gjejë të njëjtën përgjigje. Është inkurajuese kur zëri i qytetarëve gjen hapësirë në debatin publik dhe merr vëmendjen e institucioneve. Sfida jonë e përbashkët është që kjo energji qytetare dhe ky angazhim institucional të ushqejnë një dialog që forcon besimin dhe ndihmon në gjetjen e zgjidhjeve më të mira”, tha Kreu i Shtetit.
Sipas Begajt, një demokraci e konsoliduar nuk përcaktohet nga mungesa e dallimeve, përkundrazi, ajo dallohet nga mënyra se si i përballon ato.
“Dallimet politike bashkëjetojnë me demokracinë dhe Kuvendi është vendi ku ato duhet të shprehen, të debatohen dhe të përballen me argumente. Qytetarët kanë pritshmëri të larta ndaj Kuvendit për cilësinë e debatit, gjuhën politike, ligjbërjen dhe nivelin e përfaqësimit.
Kuvendi duhet të jetë institucioni ku qytetarët shohin se vendimmarrja parlamentare sjell zgjidhje konkrete: një Kuvend përfaqësues, funksional dhe llogaridhënës”, shtoi ai.
Po ashtu, Begaj theksoi se interesat afatgjata të Shqipërisë kërkojnë një vizion përtej ndarjeve të ditës.
“Siguria kombëtare, shteti i së drejtës, zhvillimi ekonomik dhe mirëqenia e qytetarëve, partneriteti strategjik me Shtetet e Bashkuara të Amerikës dhe Bashkimin Evropian, lufta kundër krimit të organizuar dhe korrupsionit, zgjedhjet dhe reforma territoriale, si dhe e ardhmja evropiane e vendit kërkojnë vazhdimësi dhe një ndjenjë përgjegjësie që i bashkon të gjitha forcat politike”, u shpreh Presidenti.
Duke u ndalur te procesi i integrimit europian, Begaj theksoi se “në këtë projekt, secili mund të japë kontributin që i takon”.
“Kuvendi, duke ushtruar plotësisht funksionin ligjvënës dhe mbikëqyrës; mazhoranca, duke i shndërruar angazhimet në rezultate; opozita, duke ofruar kontroll dhe alternativë; institucionet e pavarura, duke vepruar me profesionalizëm, transparencë, llogaridhënie dhe integritet; shoqëria civile, universitetet, media, sipërmarrja, rinia dhe Diaspora janë aktorë të domosdoshëm në këtë projekt”, tha ai.
Sipas Kreut të Shtetit, Bashkimi Evropian nuk është vetëm një destinacion diplomatik apo një objektiv politik. “Për qytetarët tanë, ai lidhet me besimin te reformat, me cilësinë e institucioneve dhe me sigurinë se ligji zbatohet për të gjithë. Reformat që na ndihmojnë për të hyrë në Bashkimin Evropian janë reforma që e bëjnë Shqipërinë më demokratike, më të drejtë, më sociale, më funksionale dhe më krenare për qytetarët e saj”, u shpreh Begaj.
Në këtë rrugëtim, Begaj veçoi konsolidimin e reformës në drejtësi, që sipas tij, “mbetet një nga përgjegjësitë më të rëndësishme të shtetit shqiptar”.
“Rezultatet e SPAK-ut janë një nga arritjet e saj më të rëndësishme. Reforma duhet të arrijë një drejtësi eficiente, me standarde evropiane dhe që ndihet në jetën e qytetarit. Një drejtësi e pavarur, e paanshme dhe me integritet është, para së gjithash, një garanci për qytetarin”, shtoi ai.
