Uashington, 26 tetor, Zhurnal.mk – Presidenti amerikan Donald Trump deklaroi dje se një marrëveshje tregtare mes Shteteve të Bashkuara dhe Kanadasë pritet të arrihet “shumë shpejt”, në një kohë kur të dy vendet vijojnë të përballen me tensione të larta tregtare, vetëm nëntë ditë përpara zgjedhjeve të rëndësishme të mesmandatit në SHBA.
Duke folur në një tubim elektoral në Port Huron, në shtetin e Miçiganit, pranë kufirit me Kanadanë, Trump u shpreh se pala kanadeze është e gatshme të bëjë lëshime të konsiderueshme për të arritur një marrëveshje.
“Do ta zgjidhim këtë çështje shumë shpejt. Ata janë të gatshëm të na japin gjithçka në këtë moment”, deklaroi presidenti amerikan.
Marrëdhëniet tregtare mes dy vendeve fqinje janë tensionuar ndjeshëm që nga gushti, kur negociatat dështuan dhe Trump vendosi një sërë tarifash të reja ndaj produkteve kanadeze. Presidenti amerikan i ka mbrojtur vazhdimisht këto masa, duke pretenduar se Kanadaja ka përfituar padrejtësisht nga Shtetet e Bashkuara për shumë vite.
Tarifat e vendosura pas dështimit të bisedimeve prekën mallra me vlerë rreth 20 miliardë dollarë amerikanë, duke përfshirë produkte të ndryshme, nga shkopinjtë e hokejit deri te çimentoja.
Kanadaja reagoi duke vendosur tarifa ndaj një vlere të barasvlershme të produkteve amerikane. Në vijim, Trump u kundërpërgjigj me një raund tjetër tarifash, që arritën deri në 50% për disa kategori mallrash.
Shtëpia e Bardhe hoqi disa nga këto tarifa pas një kërkese të republikanes Susan Collins, e cila përfaqëson shtetin e Meinit. Ky shtet është prekur në mënyrë disproporcionale nga konflikti tregtar, për shkak të lidhjeve të tij të ngushta ekonomike me Kanadanë.
Çështja ka marrë gjithashtu rëndësi politike përpara zgjedhjeve të mesmandatit të martës së ardhshme. Demokratët po synojnë të fitojnë mandatin e Collinsit, si pjesë e përpjekjeve të tyre për të marrë kontrollin e Senatit nga republikanët.
Që nga fillimi i mandatit të tij të dytë, Trump ka ndryshuar ndjeshëm politikat tregtare amerikane, duke vendosur tarifa të gjera ndaj partnerëve dhe rivalëve ndërkombëtarë. Ai ka argumentuar se këto masa janë të nevojshme për të mbrojtur ekonominë dhe interesat amerikane.
Presidenti ka lidhur gjithashtu disa prej tarifave të kërcënuara me objektiva politike dhe të politikës së jashtme, duke e përdorur tregtinë si instrument presioni në marrëdhëniet me vendet e tjera.
