Shkup, 3 nëntor, Zhurnal.mk – Zgjedhjet në Bërvenicë u shoqëruan me një narrativë politike të opozitës, sipas së cilës VLEN-i ishte i përçarë, madje që në raundin e parë të zgjedhjeve. Kjo tezë nuk mbeti vetëm në diskursin opozitar, por u shoqërua edhe me dyshime brenda vetë strukturave të VLEN-it, ku nisi të qarkullonte ideja se dikush nga brenda mund të kishte punuar kundër kandidatit të koalicionit. Megjithatë, zhvillimet e ditëve në vijim sollën një pamje krejt tjetër nga ajo që po tentohej të ndërtohej politikisht. Vetëm një ditë pas zgjedhjeve, përfaqësuesit e VLEN-it, nga bashkëkryetarët e deri te strukturat e tjera partiake, u panë të bashkuar në Dibër. Një paraqitje që, pavarësisht interpretimeve politike, dha një mesazh të qartë dallimet dhe pakënaqësitë eventuale nuk nënkuptojnë domosdoshmërisht përçarje politike, shkruan Zhurnal.
Çfarë ndodhi pas Bërvenicës?
Zgjedhjet në Bërvenicë tashmë kanë përfunduar dhe komuna ka kryetarin e ri. Por, përtej rezultatit zgjedhor, ajo që pasoi ishte një përpjekje për ta zhvendosur debatin nga gara lokale te gjendja e brendshme e VLEN-it. Në rrjetet sociale u imponua një atmosferë sikur koalicioni po përjetonte një krizë të dyfishtë përçarje brenda vetë VLEN-it dhe mospajtime brenda shumicës qeverisëse. Madje, u tentua të krijohej përshtypja se rezultati në Bërvenicë ishte pasojë e drejtpërdrejtë e mungesës së unitetit politik.
Mirëpo, nuk kaluan shumë ditë dhe skena politike mori një pamje tjetër. Përfaqësuesit e VLEN-it u shfaqën së bashku në Dibër, në një aktivitet ku ishin të pranishëm bashkëkryetarët dhe përfaqësues të strukturave të ndryshme të koalicionit. Kjo paraqitje kishte rëndësi përtej simbolikës së një vizite të përbashkët. Ajo tregoi se, pavarësisht zhurmës së krijuar pas Bërvenicës, ekziston gatishmëria për të vepruar së bashku dhe për ta ruajtur funksionalitetin politik të koalicionit.
Në këtë kontekst, pamjet nga Dibra i zbehën ndjeshëm pretendimet për një përçarje të thellë brenda VLEN-it. Sigurisht, një paraqitje e përbashkët nuk i zgjidh automatikisht të gjitha dallimet që mund të ekzistojnë brenda një koalicioni, por është tregues i rëndësishëm i vullnetit për bashkëpunim. Në politikë, uniteti nuk matet vetëm me mungesën e debateve, por mbi të gjitha me aftësinë për të gjetur gjuhë të përbashkët dhe për të vepruar në funksion të objektivave të përbashkëta. Pikërisht këtë mesazh synoi të përcjellë prania e përbashkët në Dibër.
Dibra, nga llogaridhënia lokale te mesazhi politik i VLEN-it
Fisnik Mela, përballë qytetarëve që i kanë besuar drejtimin e komunës dha llogari për punën një vjeçare. Ky aktivitet kishte një rëndësi të veçantë, sepse e zhvendosi vëmendjen nga interpretimet politike te përgjegjësia konkrete institucionale. Besimi i qytetarëve nuk është vetëm mandat për të qeverisur, por edhe obligim për të treguar se çfarë është realizuar, çfarë mbetet për t’u bërë dhe në cilat fusha duhet angazhim më i madh. Qytetarët kanë të drejtë të dinë se si shpenzohet buxheti dhe në çfarë mase zotimet zgjedhore po shndërrohen në punë dhe projekte konkrete.
Në kuadër të llogaridhënies u prezantuan investimet në rrugët e qytetit dhe të fshatrave, projekti i ujësjellësit të Mogorçës, përmirësimi i infrastrukturës sportive dhe ndriçimit publik, si dhe ndarja e banesave sociale përmes programit shtetëror. Këto janë projekte që prekin drejtpërdrejt jetën e qytetarëve dhe përbëjnë një matës më konkret të suksesit të qeverisjes lokale sesa premtimet apo deklaratat politike. Një tjetër dëshmi e punës së bërë ishte edhe parkingu i ri me 250 vende, investim i financuar nga Komuna e Dibrës, me vlerë rreth 350 mijë euro. Më 20 qershor ishte ndjekur nisja e këtij projekti, ndërsa këtë herë u bë kthimi në Dibër për ta parë përfundimin dhe vënien e tij në funksion.
Në këtë kuptim, Dibra u bë edhe një shembull i mënyrës se si uniteti politik mund të shndërrohet në mbështetje institucionale dhe rezultate konkrete.
Kampit politik shqiptar i duhen dy blloqe funksionale
Në realitetin politik shqiptar në Maqedoninë e Veriut, përçarjet nuk i shërbejnë askujt, aq më pak vetë shqiptarëve. Çdo fragmentim i panevojshëm brenda subjekteve politike shqiptare rrezikon ta dobësojë fuqinë e tyre negociuese dhe institucionale, duke i lënë hapësirë faktorëve të tjerë të përcaktojnë agjendën politike. Prandaj, një VLEN unik dhe funksional në pushtet, përballë një BDI-je kompakte dhe të organizuar në opozitë, mund të krijojnë një konfigurim politik më të shëndetshëm.
Kjo nuk nënkupton pajtim në çdo çështje, por ndërtimin e dy blloqeve që kanë kapacitet të konkurrojnë, të debatojnë dhe të ofrojnë alternativa konkrete. Një opozitë e organizuar e detyron pushtetin të jetë më i përgjegjshëm, ndërsa një pushtet i bashkuar ka më shumë mundësi të realizojë politikat dhe zotimet e tij.
Në fakt, demokracia shqiptare nuk ka nevojë për një skenë politike ku të gjithë mendojnë njësoj, por për dy blloqe politike me identitet, organizim dhe përgjegjësi të qartë. VLEN-i duhet ta dëshmojë unitetin përmes rezultateve dhe aftësisë për të menaxhuar dallimet e brendshme, ndërsa BDI-ja duhet ta dëshmojë rolin opozitar përmes alternativave dhe kontrollit të pushtetit. Një garë e tillë politike mund të prodhojë më shumë llogaridhënie, më shumë konkurrencë dhe, mbi të gjitha, më shumë përfitime për qytetarët shqiptarë.
Më shumë punë, më pak zhurmë politike
Kujtojmë që, zhvillimet nga Bërvenica në Dibër tregojnë se politika nuk duhet të lexohet vetëm përmes zërave, interpretimeve dhe betejave në rrjetet sociale. Ajo duhet të matet edhe me aftësinë për të ruajtur bashkëpunimin, për të marrë përgjegjësi dhe për të prodhuar rezultate. Nëse pas Bërvenicës u tentua të ndërtohej narrativa e një VLEN-i të përçarë, Dibra ofroi një pamje tjetër atë të bashkëpunimit politik dhe të përgjegjësisë institucionale.
Megjithatë, uniteti nuk dëshmohet vetëm me fotografi të përbashkëta, por me veprime të përbashkëta dhe rezultate të prekshme. Për shqiptarët është e rëndësishme që pushteti të jetë i bashkuar në përgjegjësi, opozita e organizuar në alternativë dhe gara politike të zhvillohet mbi bazën e punës, jo të përçarjeve të fabrikuara. Sepse në fund, qytetarët nuk përfitojnë nga zhurma për atë se kush me kë është ndarë, por nga ajo se kush çfarë ka bërë për ta. /Zhurnal.mk
