Kryetari i grupit parlamentar të Partisë Socialiste, Taulant Balla priti sot në Kuvend anëtarin e Parlamentit të Mbretërisë së Bashkuar, Paul Foster si dhe delegacionin e “Westminster Foundation for Democracy”, ku bënte pjesë edhe ish-deputeti John Grogan.
Gjatë takimit u diskutua mbi forcimin e bashkëpunimit mes Kuvendit të Shqipërisë dhe Dhomës së Komunave, më e rëndësishmja në parlamentin britanik.
“Shkëmbimi i përvojave me Dhomën e Komunave është shumë i dobishëm për rritjen e standardeve të përfaqësimit, forcimin e marrëdhënies zgjedhës i zgjedhur, si dhe përmirësimin e etikës dhe transparencës në detyrën e deputetit”, u shpreh Balla.
Ai shprehu mirënjohje për mbështetjen ndër vite të “Westminster Foundation for Democracy” ndaj Kuvendit të Shqipërisë, duke theksuar se “kontributi i WFD ka qenë i vyer në forcimin e praktikave parlamentare dhe konsolidimin e institucioneve demokratike në vend”.
