Lubjanë, 6 nëntor Zhurnal.mk – Driton Idrizi, me origjinë nga Gostivari, kandidon për anëtar të Këshillit të Qytetit të Lubjanës në Slloveni, në kuadër të listës politike „Ljubljana smo vsi“ (Ljubljana jemi të gjithë), të udhëhequr nga ish-kryeministri slloven, dr. Anton Rop.
Sipas raportimit të TV Globi, Idrizi ka përfunduar studimet master në Fakultetin Ekonomik të Universitetit të Lubjanës dhe ka ndërtuar një karrierë profesionale në pozita të rëndësishme drejtuese në kompani të njohura.
Gjatë karrierës së tij, ai ka ushtruar funksionin e drejtuesit të marketingut në kompaninë „Iskra“, si dhe ka mbajtur pozita menaxheriale në kompani me veprimtari ndërkombëtare.
Prej vitesh jeton dhe vepron në Lubjanë, ku, përveç angazhimit profesional, ka kontribuar edhe në jetën shoqërore, duke promovuar bashkëpunimin, integrimin dhe lidhjet ndërmjet komuniteteve të ndryshme.
Kandidatura e Idrizit paraqitet si një mundësi për përfaqësimin e shqiptarëve në institucionet lokale të kryeqytetit slloven, ndërsa përvoja e tij akademike dhe profesionale përbën një pjesë të profilit të tij si kandidat.
Thirrje për votuesit shqiptarë në Lubjanë
Në kuadër të njoftimit për zgjedhjet lokale të 15 nëntorit 2026, TV Globi u drejtohet shqiptarëve që jetojnë në Lubjanë, duke rikujtuar se të drejtën e votës e kanë personat që plotësojnë kushtet ligjore, përfshirë shtetësinë sllovene, moshën mbi 18 vjeç dhe vendbanimin e regjistruar në komunën e Lubjanës.
Në njoftimin e publikuar jepen edhe udhëzimet për votimin:
Të rrethohet numri 3 në fletëvotim.
Të shënohet numri 10 për kandidatin mag. Driton Idrizi.
Me këtë kandidaturë, Idrizi synon të jetë pjesë e përfaqësimit në vendimmarrjen lokale të Lubjanës, ndërsa pjesëmarrja e qytetarëve në zgjedhje mbetet një element i rëndësishëm i procesit demokratik.
