Shkup, 10 korrik Zhurnal.mk – Në Kuvend janë dorëzuar ndryshime në Ligjin për Standardin Studentor, me të cilat parashikohen kushte më të rrepta për akomodimin në konviktet shtetërore të studentëve, si dhe vendosja e kufirit maksimal të moshës prej 30 vjeç për përfitimin dhe shfrytëzimin e një vendi në konvikt.
Sipas propozim-ndryshimeve, do të zbatohen masa edukative dhe ndëshkuese ndaj studentëve që shkelin rregullat e konvikteve. Mes shkeljeve të parashikuara janë pirja e duhanit në dhoma, futja dhe konsumimi i alkoolit, dëmtimi i inventarit, lëshimi i muzikës me zë të lartë dhe mosmbajtja e higjienës.
Për shkeljet më të rënda, studentëve mund t’u ndalohet përdorimi i shërbimeve të të gjitha konvikteve shtetërore në territorin e vendit për një periudhë nga një deri në pesë vjet. Në këtë kategori përfshihen, ndër të tjera, futja dhe konsumimi i alkoolit në dhoma, dhënia e dhomës një personi tjetër për përfitim material, si dhe mospagesa e rregullt e qirasë.
Ndryshimet parashikojnë sanksione edhe për mosraportimin me kohë të defekteve që mund të shkaktojnë dëme materiale, futjen dhe përdorimin e substancave narkotike, mosrespektimin e rregullave për mbrojtje nga sëmundjet, zjarri dhe shpërthimet, përdorimin e substancave helmuese dhe materialeve të tjera të rrezikshme, si dhe shkeljen e rregullave për mbrojtjen e mjedisit.
Gjithashtu, masa ndëshkuese do të pasojnë edhe për sjellje fyese, kërcënuese, agresive ose të dhunshme, ngacmim fizik apo psikologjik, diskriminim dhe forma të tjera të sjelljes së papërshtatshme.
Propozim-ndryshimet në Ligjin për Standardin Studentor janë dorëzuar para tre ditësh dhe mbajnë nënshkrimin e katër deputeteve të VMRO-DPMNE-së.
