Shkup, 4 Mars, Zhurnal.mk – Deputeti i partisë opositare maqedonase LSDM, Dimitar Kovaçevski, sot në seancën parlamentare ka kërkuar nga ministri i Ekonomisë, Besar Durmishi, që qeveria të ndërmerrë masa për zbatim të ligjit ndaj rritjes së çmimeve të mallrave.
Deputeti tha se pavarësisht ligjit të miratuar, çmimet e ushqimeve po shënojnë “rritje dyshifrore, dhe në terren po vërehen devijime serioze dhe dallime drastike në çmimet e produkteve identike.”
Kovaçevski kërkoi “masa konkrete me një afat të caktuar” për zbatimin konsistent të ligjit, si dhe një përgjigje nëse Komisioni për Mbrojtjen e Konkurrencës është i pajisur me personel dhe teknikisht për t’u marrë me praktikat e ”padrejta” tregtare të supermarketeve të mëdha.
Sipas tij, “pa kontroll efektiv, ligji mbetet vetëm një mjet formal, ndërsa barrën e rritjes së çmimeve e mbajnë qytetarët,” thuhet në një komunikatë të LSDM-së lidhur me intervenimin e Kovaçevskit.
“Sipas dispozitave të listuara në ligj, ndër të tjera, praktikat e padrejta tregtare përfshijnë rastet kur një zinxhir shitjeje me pakicë, i quajtur në gjuhën e folur ose popullor supermarket ose rrjet supermarketesh, kërkon kompensim për futjen e një produkti të ri bujqësor dhe ushqimor në rrjetin e shitjeve dhe për zgjerimin e rrjetit të shitjeve të blerësit, kërkon kompensim për rregullimin e pikave të reja të shitjes dhe rirregullimin e pikave ekzistuese të shitjes së blerësit, si dhe zgjerimin e kapacitetit të magazinimit të blerësit, kërkon që furnizuesi të bjerë dakord për shërbime fiktive që nuk do të kryhen dhe për të cilat arsyeja e vetme është një vonesë në afatin e pagesës që është rënë dakord tashmë,” tha deputeti i LSDM-së.
“Megjithatë, dy vjet pas hyrjes në fuqi të ligjit, duke përfshirë periudhën e rregullimit, vërehen devijime serioze në terren. Sipas Zyrës Shtetërore të Statistikave, në vitet 2024-2025 çmimet e ushqimeve shënuan një rritje dyshifrore, me indeksin e kostos së jetesës për ushqimin dhe pijet joalkoolike që tejkaloi 10% në vit në muaj të caktuar. Kjo reflektohet në rritjen e madhësisë së shportës së konsumatorit, e cila tejkaloi 1,000 euro në muaj për familje. Në të njëjtën kohë, prodhuesit vendas tregojnë presione mbi çmimet e blerjes dhe kosto shtesë. Veçanërisht shqetësuese është fakti që një produkt identik nga i njëjti prodhues me të njëjtën peshë dhe deklaratë shitet në rrjete të ndryshme shitjeje me pakicë me një ndryshim çmimi deri në 50%” vazhdoi ai.
Sipas Kovachevskit veprimi shtesë nga institucionet shtetërore për të publikuar çmimet e supermarketeve, përfundoi “pa sukses”.
Deputeti ka hedhur dyshime nëse Komisioni për Mbrojtjen e Konkurrencës i ka kapacitetet e nvojshme për zbatim efikas të këtij ligji.
